E acto principal durante di apertura di e aña parlamentario nobo, semper ta e mensahe cu gobierno tin pa Parlamento y pa pueblo, cual ta ser presenta pa su Excelencia Gobernador Alfonso Boekhoudt.
Miembro di fraccion di AVP, sr Mike de Meza ta kere cu diamars mainta tanto Parlamento como pueblo, a scucha un mensahe cu den ningun parti, tabatin algo positivo y alentador pa pueblo, despues di dies luna di incertidumbre crea pa e gobierno di coalicion na mando.
“En realidad mester constata cu gobierno a permiti gobernador duna pueblo un mensahe cu ta yen di promesa y promesa, un punto cu gobierno di MEP aki nunca ta cumpli cu loke nan ta priminti y esey tin prueba suficiente caba.
Gobernador no a papia of sikiera puntra di con Prome Minister no a cumpli cu su promesa di forma un gobierno cu solamente 7 minister y tampoco a duna un aclariacion aceptabel di un gobierno cu a priminti pueblo di soluciona loke nan a yama crisis financiero, sin tuma medida.
Al contrario den ningun skina, na ningun momento nos por a scucha gobernador menciona e desaroyo cu nos pueblo ta pasando aden, pa motibo di un aumento di BBO cu a percura pa problema financiero den hopi cas rond Aruba.
E mensahe cu gobierno a manda no a contene ningun punto for di cual por deduci cu pueblo por spera alivio na caminda, solucionnan cu lo duna pueblo bek e sentimeno di trankilidad financiero y social riba corto plaso, al contrario gobierno no a atende mes e situacion serio cu ta na caminda cu posibel aumnto di prijs di awa y coriente den lunanan nos dilanti, di gasto extra pa casna rond Aruba pa motibo di cobramento pa recogemento di sushi.
No tabatin atencion mes pa e desaroyo di e refineria na San Nicolas, como sifuera esaki no ta existi mes mientras cu gobierno no a duna informacion riba esfuerso cu nan mester ta haciendo pa percura pa e proyecto importante aki pa economia di nos pais, continua su rumbo.
Aki nos ta papia di 2000 cupo di trabou directo pa loke ta e fase di rehabilitacion y entre 4 pa 5 mil cupo di trabou indirecto cu sigur lo ta un sosten inmenso pa economia di nos pais.
Gobierno no tin atencion pa e refineria cu na momento cu e ta den operacion lo brinda 800 cupo di trabou directo y entre 3 mil pa 3500 cupo di trabou indirecto pero ningun momento por a scucha gobernador atende e mensahe di gobierno aki den su discurso.
Mescos nos tin cu menciona e proyecto di exploracion di gas y petroleo como sifuera ta trata di proyectonan insignificante, mientras cu tur hende por realisa nan mes e importancia pa e proyectonan aki bira exitoso pero simplemente e gobierno aki no tin mensahe pa duna pueblo riba e proyectonan aki, ya cu en realidad nan no tin nocion mes di e magnitud y nificacion di esakinan pa economia di nos pais.
Sinembargo no por spera otro di ministernan cu den oposicion a priminti pueblo cu nan tin cantidad di compania cu lo kier rehabilita e refineria na San Nicolas, cu nan tin contacto serio y sigur, cu nan tin portanan cu ta habri na Merca pa Minister Presidente Wever Croes, cu no a habri pa ex Prome Minister Mike Eman.
Te awe ainda pueblo ta sperando riba nomber di e companianan aki, pa bin duna sosten na un gobierno cu a para na porta di e refineria y exigi pa e proceso di reapertura continua pero awe no tin atencion pa esaki durante e mensahe di gobierno durante apertura di aña parlamentario nobo.
Tampoco por a scucha un plan concreto pa desaroyo di San Nicolas manera cu nan a priminti, manera cu nan sigura pueblo cu esaki lo tuma luga, sin manda un mensahe di speransa di un proyeto of sikiera un plan concreto pa desaroyo impactante pa San Nicolas manera priminti pero cu poco speransa cu e gobierno aki lo cumpli ya cu nunca el a cumpli cu pueblo,” Parlamentario Mike de Meza a declara.