Fuera di e ex-Promer Ministro Mike Eman, un di e peor ministronan cu pais Aruba a conoce durante e ultimo 8 añanan di Gabinete Eman tabata e Minister di Inhusticia y Ilegalidad, esta sr. Arthur Dowers. Alavez ta bisto caba pa tur hende cu su persona a demostra tur tempo cu e ta posee un mentalidad anti-Arubiano.
Pa desvia atencion pa cu su fracaso total riba tereno di husticia, diripiente Dowers a dicidi di papia riba e aspectonan social den comunidad, entre otro den su odio profundo contra Minister di Asunto Social Glenbert Croes, el a haya ta bon di bagateliza e Crisisplan Social di 32 miyon florin cu entre tanto ta den su fase di implementacion y esaki den apenas 4 luna cu esaki a bira conoci pa comunidad. Pa partido MEP ta comprendibel e atake di sr. Dowers ya cu su consenshi (si e tin esaki anto!) ta remorde pa tur e maldadnan cu el a comete tempo cu e tabata sinta riba e stoel di minister. Ta danki na su maneho di criminalidad y ilegalidad complaciente, e aspecto social den comunidad a wordo derumba totalmente, ya cu combatimento di criminalidad cu man duro ta bay man den man cu realisacion di e bienestar social den comunidad. Te hasta a yega asina leu cu Dowers den su rabia y envidia no kier reconoce e maneho di Minister Glenbert Croes pa logra cu UNICEF lo bay yuda den e crisisplan social y pa por brinda proteccion na nos muchanan.
Maldadnan di ex-minister Dowers
Ex-Minister anti Arubiano Dowers diripiente kier pa pueblo lubida cu su persona tabata e autor intelectual di elimina Warda Nos Costa, elimina e helicopter di polis y laga destrui e 3 radarnan Raytheon cu mester a yuda controla nos costanan. Ta un hende cu mente diferente so por a haci tur e maldadnan aki y p’asina nos pais wordo azota cu yegada di lanchanan cu ilegalnan na gran cantidad y tambe entrada di droga y arma cu tambe a yuda influencia henter nos parti social negativamente y caminda un gran cantidad di nos hobennan a cay den adiccion y decadencia social. Y no mester lubida cu ta e mesun Dowers aki a laga cera e shelter di Hotel Central, caminda e adictonan tabata haya un lugar pa nan por drumi, baña, haya cuminda, paña limpi y pa gradualmente yuda nan den nan rehabilitacion. Hecho ta cu despues di 8 aña di e maldad aki di Dowers y su gobierno di AVP, tur e adictonan ambulante ta tur gespart rond di henter centro di nos ciudad y caminda nan a bay busca diferente scol y edificio bandona pa nan por acomoda nan mes. Y te ainda nan ta wardando riba e shelter nobo cu Dowers a priminti nan cu lo mester a bin den Playa Pabao. Esakinan ta parti di e herencia cu Dowers a laga atras despues di 8 aña y awe cu su cara laba e ta bin cuestiona e maneho social cu Minister Glenbert Croes ta hibando, ya cu sr. Croes si tin e berdadero sentimento pa esnan mas marginal den comunidad.
Crisis social inherente na debe nacional
Pero loke ta mas lamentabel ta cu sr. Dowers te ainda no kier caba di comprende cu tur e crisisnan na Aruba, pues e crisis social tambe ta inherente na redoblacion di nos debe nacional. E gobierno di AVP a percura pa aumenta nos debe nacional for di 2.1 biyon florin te na 4.2 biyon florin. Consecuencia directo di e maneho descabeya aki tabata cu nos pais tabata para na 2014 na rand di bancarota te cu Gobierno di Reino mester a interveni cu un KB, Aanwijzing y un Conseho di Supervison CAFT. Y desde e momento ey tambe e hacha di Gabinete Mike Eman a baha riba comunidad caminda nan a hacha tur caminda cu nan por a hacha y principalmente den e sector social cu reduccion drastico y te hasta eliminacion di subsidionan na tur e instancianan social. Anto ainda Dowers kier pretende cu e crisis social no ta relata na nos debe nacional exorbitante?
Rapportnan tira den bari sushi
Ora cu Dowers ta papia di muchanan abusa, e mes no tin ningun gevoel pa comproba pa su mes cu ta danki na e maneho asocial di su gobierno di 8 aña, dos criatura inocente a perde e bataya contra tur e abusonan cu a ser cometi contra nan.
Ta un hilaridad ora cu Dowers ta papia tambe di documentonan y rapportnan cu a wordo traha door di gruponan nacional y internacional cu a analisa e situacion por ehempel di nos muchanan. Pero Dowers ta lubida di bisa acerca cu su gobierno durante 8 aña largo no a ehecuta ningun di e rapportnan aki y simpelmente nan tabata tira tur den bari di sushi. Y tur hende sa cu Dowers durante cu e tabata minister no tabata tin ningun balor di tur e rapportnan cu su departamentonan a produci y te hasta el a percura pa ningun di e rapportnan of documentonan mira luz di dia.
Pues partido MEP ta conclui cu e ultimo persona cu por papia riba asunto social na Aruba ta e ex-Minister asocial di Dowers. Un persona falso y cu un mentalidad anti-Arubiano!