Pa bin na remarke, e persona mester teme pa su bida
Durante rueda di prensa semanal di Gobierno di Aruba, Prome Minister Evelyn Wever-Croes a duna informacion amplio rib’e tema di Venezuela y con esaki lo afecta Aruba. E situacion na Venezuela ta keda hopi delicado y dificil y tur dia miles di Venezolano ta purba di sali for di nan pais pa hui di e situacion dificil aki.
Prome Minister a indica cu Aruba tambe ta sinti e salida di Venezolanonan aki. Varios ta esnan cu den madruga y den forma peligroso ta logra drenta nos costanan indicando tambe e desesperacion cu ciudadanonan Venezolano ta den. Varios persona ta wordo deteni mientras no ta conoci ainda si tin mas cu ta logra hui.
“Esaki ta un reto cu tin e preocupacion y atencion di Gabinete Wever-Croes tur dia”, Prome Minister a bisa.
Prome Minister a elabora riba e tema di asilo bisando cu e problemanan na Venezuela ta externo y logicamente Aruba no por soluciona ni influencia den esaki. Sinembargo Aruba ta prepara pa tur eventualidad. Gobierno di Aruba tin su plannan desaroya den caso si mester tuma accion.
E mandatario a aclarea cierto informacionnan incorecto cu ta bay rond indicando cu Aruba lo ta dunando asilo na Venezolanonan. Prome Minister y Minister Bikker a reuni diasabra cu a pasa cu e departamentonan encarga cu e tema di asilo p’asina haya informacionnan concreto di loke ta socediendo. E departamentonan a indica cu nan no a duna asilo y di otro caminda hende ta mustra cu documento cu nan a pidi y te hasta haya asilo.
Sinembargo, Prome Minister ta enfatisa cu na Aruba tin un procedura so pa trata dunamento di asilo politico. Asilo por wordo otorga solamente ora cu e persona cu ta pidi asilo teme pa su bida. E hecho cu un persona ta hui di nan pais pa motibo cu economicamente no por sobrevivi eynan, lo no ta aplicabel pa un persona bin na remarke pa haya asilo politico pero ta wordo considera como un migrante economico.
Prome Minister a aclaria tambe cu pa haya asilo politico, un persona no solamente mester teme pa su bida sino tambe e mester aplica pa asilo na momento cu e drenta e pais. Esnan cu ya ta bibando na Aruba, no por bin na remarke pa haya asilo politico.
Aruba ta mara na tratadonan pa duna asilo politico. Tin varios peticionnan pa asilo politico cu a drenta. Esakinan ta wordo revisa pa un comision. E personanan cu a entrega e peticionnan lo wordo entrevista y lo evalua si di berdad e personanan aki ta teme pa nan bida pa bin na remarke pa haya asilo.
“Na e momento aki, no tin un asilo politico cu a wordo duna ainda na Aruba. Varios caso ta den procedura di wordo trata y evalua. Pero te ainda niun ta bin na remarke pa wordo otorga asilo politico”, Prome Minister a duna di conoce.