ORANJESTAD – Diabierna mainta minister Ruiz-Maduro a ricibi e tesis titula “Placing Culture and Creativity at the Heart of the Aruban Sustainable Development. An Exploratory Research on the Possible Economic, Cultural and Social Impact of a Creative Industry” for di Thaïs Franken kende a obtene su Bachelor of Arts degree in Organization, Governance & Management na Universidad di Aruba.
Na 2014 Thaïs a cuminsa e bachelor studie Organization, Governance & Management (OGM) na Universidad di Aruba. Den 2017 e studio aki a wordo acredita como un WO-bachelor studie pa Nederlandse en Vlaamse Accreditatie Organisatie (NVAO).
Na 2017 Thaïs Franken a haci su pasantia (stage) na Departamento di Economia, Comercio y Industria (DEZHI). Ta unda su pasion pa cultura y su interes den e tema di “Sustainable Development Goals” (SDGs) den e area di cultura y creatividad, cu lo por ta un posibel pilar economico nobo pa Aruba, a crece mas y mas.
Prome cu esaki Thaïs Franken a haci un intercambio educacional pa un semester na Belgica y a haci un “summer school” na The Hague University of Applied Sciences. Como studiante Thaïs Franken tabata asistente di dr. Luc Alofs den cuadro di e proyecto Travelling Cultural Heritage, cual proyecto ta financia pa Instituto Hulandes pa investigacion scientifico (NWO).
Riba 6 di Juli 2018, cuater aña despues, Thaïs Franken a gradua cu un 9 pa su tesis cual ta titula “Placing Culture and Creative Industries at the Heart of the Aruban Sustainable Development”, ricibiendo su Bachelor of Arts.
Den cuadro di su tesis Thaïs Franken a studia e.o. documentonan nacional di maneho economico, cultural y social, documentonan di UNESCO, UN, EU commission etc. y documento cu ta investiga con paisnan cu un economia chikito (SIDS) por atende cu e tema di “Sustainable Development”. E tesis a consisti di un inventarisacion di recursonan cultural y creativo di Aruba. Y un investigacion di e posibel impacto economico, cultural y social di un Industria Cultural y Creativo. Thaïs Franken a logra entrevista 16 representante di GOs, NGOs y trahadornan den e veld cultural y creativo. El a haci un SWOT y TOWS analisis pa inventarisa su datosnan. E analisis a duna 28 strategia cu lo por facilita un desaroyo di un industria nobo na Aruba den e area di cultura y creatividad e asina yama “Culture and Creative Industries (CCI).
Thaïs Franken awor ta bay haci su master den Public Policy and Human Development na University of Maastricht, specificamente na e Graduate School of Governance. E master aki ta un double degree program conhuntamente cu United Nations University. Como hoben profesional, Thaïs su deseo ta pa sigui desaroya su mes cu conosemento y experiencia pa asina un dia aporta bek na su pais.
Minister Ruiz-Maduro a gradici Thaïs pa e informacion cual sigur lo yuda pa explora e potencial cu cultura ta brinda pa e economia di nos Pais. Thaïs a wordo acompaña pa su mayornan Ronnie Franken y Jeanine Franken-Tuyeehut. Na final a desea Thaïs hopi exito y cu pronto e lo por obtene su master’s degree.