Mester cuestiona e derecho di e actual gabinete, pa sigui goberna pais Aruba, ta loke mr Carl Giel di AVP a mustra y a menciona cu gabinete Wever Croes ta existi a base di ‘kiersbedrog’ y como tal esaki no tin derecho di existencia.
“E base di nos democracia ta bin for di e democracia directo cu a cuminsa na Grecia antiguo, den e cao aki Atenas, caminda full e pueblo ta scoge con pa maneha e pais.
Cu tempo esey a bira casi imposibel pa motibo cu pueblonan a bira grandi y no ta tur hende por a wordo envolucra den maneho di e pais.
Dor di esey a bin e parti di maneho indirecto caminda pueblo ta kies su representantenan kendenan ta bay traha na bienestar di e pueblo y ehecuta e plannan cu nan a bin cune dilanti pa nan bay ehecuta esey na fabor di e pueblo y esey nos ta yama un democracia representativo.
Esey nos tin na pais Aruba cu ta e democracia representativo.
Con e ta funciona den practica e democracia representativo, pueblo ta kies for di representantenan, den e caso aki miembronan di Parlamento, pa bay traha na bieneficio di pueblo a base di plan cu partidonan politico ta presenta den campaña.
Esaki ta encera cu pueblo ta duna esunnan cu a campaña c’un plan, esunnan cu nan ta haya e plan ta miho, pueblo ta bay duna nan e sosten cu nan voto y esakinan ta bay representa pueblo den Parlamento.
Kico nos tin aworaki na Aruba?
Nos tin cu pueblo a kies su representantenan a base di un engaño y aki nos ta papia di un ‘kiezersbedrog’ y di con mi ta menciona esaki, pasobra e partido mas grandi den gobierno na e momentonan aki, a bay campaña cu nan ta bay atende e asunto financiero di pais Aruba, sin medida.
Nan a bisa tambe durante di e debate cu tabatin prome cu eleccion na Marriott, dia cu e partidonan politico a presenta nan plan, mi a scucha lider di partido di mas grandi, MEP, a menciona cu nan tin e plan, nan tin un team, pa atende cu e problemanan sin medida.
Aworaki kico nos ta haya, e gobierno actual ora cu nan a haya sosten di pueblo, ta haciendo net lo contrario caminda nan a bisa cu nan lo no bay tuma medida pero ta tumando medida.
Nan a bisa cu nan ta bay kita parkeermeters, nan no a kita parkeermeters, nan a bisa cu nan ta bay baha edad di pensioen, nan no a baha edad di pensioen, nan a bisa cu nan lo no bay kita hende, nan ta bezig ta kitando hende dia tras dia.
Nan a bisa cu nan ta bay baha gasto di gobierno, nan ta aumentando gasto di gobierno, hendenan cu salario barbaro, haciendo biahenan y tur esakinan.
Awor e ‘smoking gun’ den e caso aki cu nan no tabatin un plan, cu nan a engaña pueblo cu esaki ta y mi a wak esaki algun siman atras, den un comunicado di prensa caminda Presidente di Parlamento, mr Ady Thijssen, kende a forma parti di e campaña di MEP, e ta bisa: “Mita urgi pa gobierno bin c’un plan economico pa drecha economia di Aruba.”
Ora cu mi a lesa e comunicado aki, mester a lesa esaki dos biaha ya cu den campaña nan a bisa pueblo cu nan tin e plan y awor un mesun miembro di e fraccion, esun mas importante, cabes eigenlijk di pais Aruba, como Presidente di Parlamento, ta cuestionando su mesun hendenan bisando pa nan bin c’un plan mientras su supuestamente e plan aki tabata cla caba.
Den e caso aki bo ta wak cu eigenlijk pueblo a wordo engaña y aki nos a wordo confronta, manera ta woro bisa den Hulandes, ‘kiezersbedrog.’
Pueblo a wordo engaña pa vota pa nan traha pa nan traha na fabor di pueblo, pero nan no ta trahando na fabor di pueblo pero nan ta trahando na fabor di partido y e hendenan a sponsor e partido aki.
Nan ta uza como argumento, esta cu nos tin un crisis y a bin c’un crisisheffing, y mi ta puntra mi mes, ora cu bo ta den un crisis, bo comportacion como gobierno tin cu demostra esaki tambe cu bo ta den un crisis.
Pero comportacion di gobierno den e situacion aki no ta refleha di un situacion den un crisis ya cu manera cu nan a drenta gobierno na november, practicamente tur miembro di gobierno, a busca autonan nobo y mi tin entendi cu tin autonan cu a wordo busca cu balor di 160 mil florin.
Si bo ta den un crisis, nan ta bisa cu e pais den un crisis, bo no ta busca un auto di 160 mil florin y esaki ta conta pa solamente un minister pero tur e ministernan a busca autonan y tin cu tin mas c’un auto tambe.
Ora cu conta e costo di e autonan aki, e ta surpasa un miyon florin practicamente y aki nan ta bisa cu nan ta den crisis pero ta haci gastonan di luho y e dos cosnan aki no ta bay pareu,” mr Carl Giel di AVP a trece dilanti.