LAGANDO E BEACHNAN DEN UN ESTADO PURO
ORANJESTAD – Oficina di Turismo Aruba (A.T.A.) ta contento di por comparti cu e proyecto di revitalisacion di Palm Beach ta canando conforme plan. E proyecto aki a wordo hinca den otro cu cooperacion di diferente instancia local, y ehecuta pa e compania Varadero Aruba. Pa fin di e aña aki e trabou lo conclui, y e resultado lo revitalisa e beach den e area di Playa Linda te na Moomba Beach. Diabierna ultimo Minister di Turismo, Salubridad Publico y Deporte Sr. Danguillaume Oduber conhuntamente cu CEO di A.T.A. Sra. Ronella Tjin Asjoe-Croes, y Destination Services Executive di A.T.A. Sra. Roxane Wolff y varios otro presente, a haci un inspeccion pa asina por sigui mas di serca desaroyo pa cu e proyecto aki.
E condicion y bienestar di nos beach ta un prioridad pa A.T.A. como e entidad cu ta maneha y desaroya nos isla como destino turistico. Adicional na nos seguridad y e amabilidad di nos hendenan, nos santo blanco y lama blauw ta mas cu djis un recurso; e ta un tesoro nacional. Como tal, A.T.A. a tuma e iniciativa pa revitaliza nos beachnan tanto na canto, como tambe bou di awa pa asina hib’e y mantene na un estado mas puro cu ta posibel.
Parti di e proceso di restoracion ta nifica cu lo bay kita tur e santo bieu, sushi y e santo cu a bira manera lodo. Lo refresca e areanan afecta cu santo limpi y saludabel. E proceso ta uno comun na diferente pais caminda ta busca pa mantene y/of restora beachnan publico cu a perde tereno door di erosion di lama. Di e manera aki A.T.A. kier sigura cu nos beachnan ta keda bunita y agradabel pa nos bishitante y nos propio habitantenan.
Revitalisacion di beachnan ta un proyecto cu ta forma parti di e Plan di Accion multi-anual cu A.T.A. ta implementando. A duna tarea na e compania Civil Engineering Caribbean (CEC) pa realisa e investigacionnan pertinente na e recuperacion di beach y tambe salud di su suelo. Estudionan intensivo a ser haci durante 2016 y 2017. Recientemente a contribui cu Departamento di Obranan Publico (DOW) tambe na un estudio mas amplio haci door di e compañia Deltares.
A.T.A. ta trahando den forma estrecho cu Departamento di Naturalesa y Ambiente (DNM) y DOW cu ta supervisando y brindando conseho caminda trabounan ta ser haci pa sigura cu ta respeta tur regla ambiental, ademas di proteha bida marino. A.T.A. ta sumamente satisfecho con e coordinacion aki ta canando y cu hunto ta haciendo algo sumamente positivo pa nos isla.
Varadero Aruba ta un compania local cu tin riba 40 aña di experiencia den e industria marino. Cu un ekipo di profesionalnan altamente entrena y capacita, ta realisa diferente servicio relaciona cu investigacion, limpiesa y mantencion submarino. Varadero Aruba a mobilisa ekiponan pa e revitalisacion den e area di Palm Beach comienso di juni 2018. E area di trabou ta cubri for di Playa Linda pa Moomba Beach, reparti den seis pida (cada un di 80 meter) pa asina minimalisa molester pa e turista y hotelnan. Ehecucion ta programa pa culmina den prome siman di november.
Adicionalmente, Varadero ta cumpliendo cu reglanan estricto di seguridad cu ta busca pa proteha usuarionan di beach, como tambe garantisa e bon ehecucion di e trabounan necesario. Cada fase ta cubri un seccion den e area ariba menciona cu lo ta claramente marca cu heki. Trabounan ta andando di dialuna pa diabierna entre 7’or di mainta te cu 5’or di atardi. A percura pa e zonido ta minimo y cu publico por bay den awa trankilamente pafo di e area cu ta cera cu heki tanto pa landa como pa sambuya; tampoco ta afecta e uzo di e beach na canto. Adicional na e supervision di DNM pa cu fauna y flora marina, tambe ta conta cu guia y supervision publico di parti di Cuerpo Policial Aruba, Polis Maritimo y Strand Politie. Embarcacionnan regular di e sitio tambe a ser informa y lo mester pasa rond y keda pafo di e area marca.
A.T.A. ta gradici e cooperacion di tur e instancianan menciona, sector hotelero y nos comunidad en general, ademas di tur otro compania y/of individuo cu ta aporta na e realisacion di e proyecto aki cu, un biaha mas, ta di importancia vital pa nos pais su economia y futuro. Ta spera di por conta cu e comprension di sector hotelero y naturalmente nos comunidad pa asina hunto por alcansa e obhetivo.