Den un raport di Banco Central, State of The Economy 2017, publica recien ta indica cu economia a subi cu 1.2% den aña 2017. Esaki, apesar di ta un noticia positivo, segun e Parlamentario Setty Christiaans-Yarzagaray, tambe tin su banda menos positivo. Esaki mirando e hecho cu e pronosticonan di crecemento di economia pa 2017 tawata na 2.7% na cuminsamento di aña. Despues di a wordo revisa durante 2017, esaki a wordo baha na 1.8%. Tawata premira dado momento cu economia lo crece den 2017 cu 2.7% cu ta un diferencia di 1.5% menos compara cu realmente a registra.
Parlamentario Christiaans-Yarzagaray ta duna di conoce cu apesar cu esaki ta mustra positivo, toch e ta laga tambe un sentimento cu cosnan negativo tambe a sosode mirando e hecho cu e pronostico tawata mas cu dobbel originalmente. Esaki ta un refleho cu e maneho di e Gobierno anterior, cu tawata tin e filosofia di inverti hopi placa den infrastructura, pensando cu di e manera aki lo ‘spin off’ economia, a faya. Ya pa 3 aña of mas ta comproba cu e maneho aki no a logra. Esaki a wordo comproba tambe pa e raport di ‘State of the Economy 2017’ na unda cu ta indica cu e desaroyo di inversion ta bou nivel. E efecto cu nan a premira a mantene su mes bou nivel esaki debi na varios aspecto. Un di e factornan ta e rifeneria tambe cu no a concretisa.
Christiaans-Yarzagaray ta indica cu Turismo tawata e industria cu a yuda cu awe por tin un resultado di 1.2% di crecemento, siendo en principio e unico pilar economico di nos pais. Criyoyamente bisa, e Parlamento a expresa, ta mustra cu Aruba atrobe ta keda pone webonan den e mesun macuto, splicando cu apesar a gasta asina hopi placa na inversionnan, ta turismo ta esun cu a duna un resultado positivo den crecemento economico.
Segun e Parlamentario a splica, e crecemento economico aki no ta simplemente turismo en general tampoco. Un parti di esaki ta debi na e efecto di horcan den otro area di Caribe, cu a causa cu e cantidad di bishitantenan crucero tambe a subi. Pero si, riba un tono mas positivo, ta e hecho tambe cu e cantidad di bishitantenan di Merca a subi apesar cu bishitante di Venezuela a baha drasticamente. E cantidad di bishitantenan di Merca a compensa pa caida den mercado Venezolano aki. Mercado Mericano a subi cu 10.6% cu tambe a conduci cu e placa cu bishitantenan ta gasta na Aruba a subi.
Christiaans-Yarzagaray ta indica cu inversion en general a experiencia un bahada di 0.5%, cu ta trece tambe e pregunta cu si a gasta asina tanto placa den inversion, dicon esaki no a duna e resultado positivo premira pa economia y tambe, na unda e placa a bay anto? Inversionnan ta inclui sector priva tambe ademas di sector publico, mientras cu e boost di sector publico tawata inmenso den inversion y toch esaki no a duna resultado den economia manera Gobierno anterior a gaba.
E raport di Banco Central a indica tambe riba e operacion di gobierno pues relatando na e finansas publico. Entradanan di gobierno a subi cu 0.5% mientras cu gastonan a baha cu 3%. E raport ta indica cu e reduccion di 3% aki ta bin mas tanto di e post ‘goederen en diensten’. Parlamentario Christiaans-Yarzagaray, den esaki ta asumi cu e cambio di gobierno a trece cu ne cu hopi contract a wordo kibra resultando den un reduccion di 11.2% den e post di gastonan aki. Gastonan di personal tambe a experencia un caida entre 2% y 4.2% den salario etc. Danki tambe cu e gobierno anterior su cambio di maneho riba subsidio den fundacionan, cu ta e parti social, esaki a experencia un bahada di mas cu 36 miyon florin.
Un crecemento den entrada di 0.5% y un caida den gastonan, ta loke a hiba na un miho resultado financiero pa 2017 pa loke ta trata operacion di Gobierno. Sinembargo, e Parlamentario ta bisa, cu e hecho cu door di cambio di maneho a baha subsidio di fundacionnan pero si a gasta tanto placa den inversionnan cu no a duna resultado tampoco, ta haci cu awe e area social no a haya e atencion necesario y debido y cu awe nos ta sinti e consecuencia di esaki.
Parlamentario Christiaans-Yarzagaray ta termina bisando cu ta premira den e aña aki y en adelante, un crecemento di 1% pa aña segun e raport di FEM. Tur cos ta indica cu Gobierno di Aruba a tuma un posicion un poco mas conservativo contrario na e gobierno anterior cu ta papia di inversionnan hopi grandi y di crecemento economico cu no a duna resultado.