Parlamentario Setty Christiaans-Yarzagaray siguiendo e desaroyo di prijs di gasolin, a haci un investigacion chikito den e luna actual pa wak con e prijs di crudo ta desaroyando mundialmente. Den luna di mei ainda e fluctuacion di prijs di crudo internacional tin un pik mas halto cu den e lunanan anterior ora haci un comparacion di un aña largo. Segun e Parlamentario, esaki ta logico cu tin su efecto tambe riba e prijs di gasolin na Aruba.
Prijsnan di crudo cu ta wordo uza pa calcula prijs di gasoline na Aruba y otro paisnan na mundo tambe, ta di ‘West Texas Intermediate Crude Oil Prices’ (WTI). Algo cu Parlamentario Christiaans-Yarzagaray ta considera un bon noticia ta cu, segun pronostico di e instituto aki, prijs averahe di crudo lo stabilisa den aña 2018 y tambe nan ta premira cu pa aña 2019 lo tin un bahada den prijs di crudo averahe di algo menos cu $3 en comparacion cu e aña anterior.
Buscando informacion riba diferente pagina online, e Parlamentario por conclui, tumando nota di un serie di informacionnan pa loke ta trata prijs pa bari di crudo den luna di juni, cu por premira cu e informacion ta indica te ainda cu pa luna di juli por spera un bahada di prijs di gasolin. E opinion aki, segun e Parlamentario e por duna considerando e methodo cu Aruba ta calcula prijs di gasolin basa riba e prijs di crudo y tambe mirando con e tendencia di prijs ta desaroyando mundialmente den e luna aki. E Parlamentario ta bisa cu e ta spera cu por bin un bon noticia pa nos comunidad, na unda cu por tin un stabilisacion den prijs di crudo pa resto di aña tambe.
Segun Parlamentario Christiaans-Yarzagaray tin diferente aspecto mundialmente cu ta afecta e prijs di crudo. E momento cu ConocoPhillips a gana caso contra PDVSA, cu ta un di e proveedornan mas grandi di crudo, PDVSA a sufri un perdida di hopi placa. PDVSA mes tambe tin hopi menos crudo riba mercado mirando su convenionan cu e tin cu Rusia y China entre por ehempel. Ta spera si cu for di awo en adelante por tin un stabilisacion den mercado petrolero y ta premira tambe un bon noticia, cu pa luna di juli lo tin un bahada den prijs di gasoline na Aruba.