CAFT a keda convenci cu e contestanan y splicacion di gobierno
ORANJESTAD – Desde cu Gabinete Wever-Croes a asumi gobernacion ela scoge pa goberna cu seriedad y e maneho financiero a wordo atendi desde comienso pa gobierno y su profesionalnan y a scoge desde inicio pa trece e realidad financiero padilanti manera cu e ta.
Den su ultimo relato riba Presupuesto 2018, CFT tabata tin 3 pregunta di cual nan tabata kier mas clarificacion ariba dje. CFT tabata tin e problema cu locual ta bira e entrada di RDA. CFT tabata kier waak mas documentacion pa mira cu esaki ta bay ta realistico si of no, mas aun si nos mira cu e buraco na 2017 a wordo ocasiona tambe pa e parti di e placanan di RDA cu no a drenta. CFT tabata kier sigura cu 17.5 miyon lo drenta caha di gobierno. Pa locual ta e entrada di di ATA, caminda CFT ta waak esaki como dobbel, gobierno a mustra CFT cu no ta asina manera nan ta pensa y ta mucho prematuro pa conclui cu e entrada aki lo no wordo realiza.
Pa locual ta gastonan personal CFT tabata kier a mira ariba tambe ariba termino largo pa e gastonan aki ta baha. Aki Gobierno a splica riba su plan di cual ta e pasonan cu ta tuma awor na 2018 y tambe kico tin cu haci a termino medio y termino largo pa asina por controla e gastonan di personal.
E di tres y ultimo pregunta di CFT tabata e parti di debe, pa e debe aki no sigui crece mas cu 90%, CFT na comienso tabata tin un preocupacion, paso ela pensa cu esaki lo sigui subi den 2018 pa 93%. Gobierno a trece dilanti cu CFT ta sali for di un punto di bista eroneo, caminda e informacion cu nan a usa pa calcula no ta corecto y na final CFT a bin acepta tambe cu esaki tabata asina.
Cu e contesta y splicacionnan duna y e forma serio cu Gabinete Wever-Croes a bin ta atende e situacion desde comienso a crea e confiansa y credibilidad pa CFT a duna e seyo realistico na Presupuesto 2018 di gobierno di Aruba.