Dr.Horacio E. Oduber Hospital – Oranjestad
Ariba diaranson 13 di juni pa 14 juni marduga, un caso lamentabel a sosode na Dr Horacio E. Oduber Hospital.
Durante e marduga di 14 di juni, un homber aparentemente lo a pone fin na su bida ariba piso 3 di e edificio nobo di hospital,
esaki lo mester a sosode den un baño.
Segun nos a compronde, cu na momento cu e persona aki a wordo descubri, ya elo tabata tin algun rato caba cu elo a fayece.
E caso aki a capta nos atencion, paso segun nos a compronde cu autoridadnan concerni aparentemente no a wordo avisa di e sucedido aki.
Normalmente den tur caso di horcamento, autoridadnan concerni ta wordo avisa, entre otro departamento forensico di cuerpo policial (BFTO) mester wordo notifica pa por presenta y haci investigacion, pa asina conclui, si e persona mes a pone fin na su bida of si por ta trata di algo otro.
Segun nos a compronde, a wordo menciona cu polis lo a presenta,pero si tawata asina mes, kiko lo a wordo bisa na e patruya, cu ta esun cu ta yega prome na un incidente y cual ta encarga pa notifica autoridadnan concerni. Den e caso aki, e procedura di informa e autoridadnan concerni no a sosode e marduga di 14 di juni na Dr.Horacio E. Oduber Hospital .
Nos tin entendi cu slachtofferhulp si lo a wordo notifica y lo tawata presente pa atende cu e famia di e defunto.
E caso aki a haya un buelta straño, despues cu e persona a supuestamente pone fin na su bida den un baño, e curpa lo a wordo movi for di e baño y hiba pa su cama. E curpa tawata ariba su cama ‘drumi’.
Remarcabel ta, cu fisicamente no tin mucho indicacion cu lo por ta trata di un horcamento. Kiko a pasa cu e pashent aki e anochi di 13 pa 14 di Juni? E a drenta hospital pa un of otro tratamento y ta wordo haya sin bida. Dicon autoridadnan concerni no a wordo avisa, manera den tur otro caso di suicidio?
E caso aki ta uno cu siguramente mester wordo investiga profundamente pa si acaso lo por tin cualkier iregularidad cu lo por a tuma luga.