ORANJESTAD, Aruba – 21 di Juni 2018: E aña aki Dia Olimpiada 2018 lo ta diasabra awor dia 23 di Juni. Instituto Biba Saludabel y Activo (IBiSA), Comite Olimpico Arubano (COA) y Aruba Bank a bini hunto pa organisa e evento, cu top atletanan di deporte y diferente federacion.
E atletanan top confirma cu lo ta presente ta Quincy Breel di atletismo, Shanaya Howell BMX, Feddison Flanders, Joël Kuiperi di Weighlifting, Chiara Petrocchi y Monica Pimentel di Taekwondo y Sophia Petrocchi di Judo, pero por ta lo conta cu presencia di mas atleta e dia aki. E atletanan aki lo elabora di nan deporte y lo conta nan experencia.
E federacionnan cu lo ta presente ta Aruba Boxing Association, Aruba Lawn Tennis Bond, Aruba Schietbond, Aruba Volleyball Association, Amateur Baseball Bond Aruba, Aruba Taekwondo Association, Aruba Softball Bond, Aruba Table Tennis Bond, Scherm Amateur Bond Aruba y Tang Soo Do Aruba. E federacionnan lo ta dunando presentacion na e publico presente.
Aruba Bank, COA y IBiSA ta invita tur hende pa yega parkeerplaats di Aruba Bank na Camacuri y bin pasa e mainta haciendo deporte, haya sa mas di deporte, conoce mas di e federacionnan y atletanan.