ORANJESTAD – Diadomingo ultimo a tuma lugar e apertura oficial di e exposicion di Tribon na
Parke Nacional Arikok como parti di “Shark Week Aruba 2018”. PNA ta sumamente contento cu
e publico cu a presencia e apertura di Shark Week Aruba 2018, y ta agradeci pa tur e
comentarionan positivo cu a ricibi pa cu e informacion y contenido di e exposicion di Tribon. E
exposicion tin informacion amplio tocante e tribonnan cu nos tin rond di nos isla y nan
importancia pa un ecosistema marino saludabel.
Shark Week Aruba 2018 a wordo oficialmente inaugura dor di team di Parke Nacional Arikok
acompaña pa Sr. Jorgen Raymann cu a hiba algun palabra na tur presente como embahador di
Save our Sharks. Sr. Raymann a yuda enfoca e aspectonan principal di nos tribonnan. Manera e
balor economico cu nos tin na un tribon bibo, cual ta casi 2 miyon dollar, compara cu un tribon
morto riba mercado cu ta trece 100 dollar. E estimado aki ta basa riba e contribucion cu un tribon
ta duna na nos turismo y pesca, sea directo of indirecto.
Como parti di e programa pa Shark Week Aruba 2018 a duna lectura na diferente skol basico y ta
extende un invitacion na e pueblo di Aruba pa e clausura di Shark Week 2018 cu un tremendo
Anochi di Pelicula ariba diasabra 16 di Juni 2018 unda cu nos lo tin “This is your Ocean: Sharks” y
“Shark Bait”.
Shark Week Aruba 2018 no lo ta posibel sin e sosten cu ta ricibi di Dutch Caribbean Nature
Alliance cual a ricibi fondo di Postcode Lotterij pa asina por organisa Shark Week den Reino
Hulandes. Parke Nacional Arikok lo por sigui haci estudionan pa colecta informacion di nos
tribonnan y concientisa e pueblo di Aruba riba e importancia di un populacion sano di tribon rond
di nos isla.
E exposicion di Tribon por wordo bishita tur dia entre 8:00 am y 4:00 pm na e Centro di Bishitante
na Parke Nacional Arikok. Pa cualkier informacion por tuma contacto cu Parke Nacional Arikok
libremente na 585 1234 of via email na [email protected].