Home Local Ceramento di caminda en conexion cu trabounan di mantencion

Ceramento di caminda en conexion cu trabounan di mantencion

ORANJESTAD – Departamento di Obra Publico ta informa pueblo di Aruba en general y specialmente nos automobilistanan, cu ta haci uzo di e caminda di Julianastraat, di lo siguiente. Diabierna dia 15 di juni 2018 for di 8:30’or di mainta te 4’or di atardi, e caminda di Julianastraat lo ta cera. E motibo ta cu departamento di Riolering mester haci mantencion.
Lo cera Julianastraat for di e cruzada di Maria Christinastraat y lo desvia e trafico for di Zoutmanstraat pa Beatrixstraat.

Alabes diabierna, departamento di Infra & Verkeer lo cera e caminda na altura di rotonde di Piet’s Soda Fountain/ de La Sallestraat pa motibo di mantencion (verf).
Lo bay desvia e trafico di de La Sallestraat pa Caya Gilberto Toppenberg – Reamurstraat – Edisonstraat – Rudolf Arendsstraat y Caya Ernesto Petronia.
E trabou aki lo cuminsa 9’or di mainta y lo caba 10:30’or di mainta.

Por ultimo 10:30’or di mainta lo marca e zebrapad na altura di Imeldakleuterschool y esaki lo dura te cu 12’or di merdia.
Pa esaki ta desvia trafico via e rotonde di Sero Blanco pa Caya Ing. Roland Lacle Dominicanessenstraat – Van Leeuwenhoekstraat y De La Sallestraat.

En conexion cu e trabounan menciona Departamento di Obra Publico ta haci un peticion na tur automobilista pa no haci uzo di e camindanan menciona y ta pidi pa tene cuenta cu e inconveniencianan cu lo por surgi pa cual nos ta pidi nos disculpa.