ORANJESTAD, Aruba – 11 di juni 2018: For di mas di 2 luna pasa e ekipo di siguridad di Aruba Bank a detecta transaccionnan sospechoso via ATM. A inicia un investigacion interno inmediatamente y a pasa e investigacion completo den man di Polis. Den cuadro di esaki, a duna husticia tur espacio pa por haci nan investigacion y hasta a conduci na detencion di sospechosonan.
Di parti di Aruba Bank, a informa tur instancia concerni y ta garantisa cu su mashinnan ta sigura debidamente y cu clientenan por haci uzo di servicionan sin ningun problema. Ta precisamente dor di e sistema moderno cu e banco tin, cu a bira mas facil pa autoridadnan por a yega asina lihe na e sospechosonan. Mas detaye di e caso ta keda na Ministerio Publico di Aruba pa anuncia.
Aruba Bank ta consciente cu malhechornan lo sigui busca metodonan pa haci actonan criminal en particular riba ATM’s, cu ta un trend mundialmente. Pa tal motibo Aruba Bank continuamente ta traha pa garantisa cu tur su sistemanan ta sigur.