Hospital a scoge nan empleado di luna di mei en conexion cu siman di enfermeria a cay den persona di Tina Duinkerk, verpleegkundige na departamento B3. Tina Duinkerk no tabata sa cu su coleganan a nomin’e y no a spera cu nan tabata warda riba dje cu e tremendo noticia aki cu ela bira empleado di luna di Mei na Hospital.
Ruthmila Odor-Croes, Zorgmanager di B3, a duna di conoce cu Tina Duinkerk tin mas cu 10 aña trahando na Hospital y ademas di ta verpleegkundige riba e piso, e ta un verpleegkundige cu trabounan di coordinacion. Tina Duinkerk su rol riba e departamento ta pa garantisa cuido di calidad, asina e Zorgmanager a splica.
Tina Duinkerk ta hopi bon den su trabou, e ta corda semper riba e protocolnan cu nan mester sigui. Tambe e ta un tipo di persona cu no ta riya di bisa un otro colega si e no ta traha segun e protocol aki. Si e ripara cu e colega ta sigui haci esaki mas biaha, Tina Diunkerk ta raporta esaki tambe. Pa Ruthmila Odor-Croes esaki ta algo bon, pasobra den e trabou di enfermeria bida humano ta hopi importante y no por haci wega cu esey.
Tina ta keda “update” su conocemento, ta stima su trabou y ta bin tur dia cu un sonrisa. E no ta bay cas si e no laga tur cos netjes y ordena atras. Na departamento B3 Tina ta cuida su coleganan y ta negosha tur dia e peso di trabou di cuido cu e team y ta habri pa sali for di e rutina pa asina tur pashent ricibi un cuido optimal. Tambe Tina ta keda trece solucionnan pa mehoracion riba e piso nobo.
E sorpresa pa Tina Duinkerk tabata peculiar, pasobra ela caba di bay cu zwangerschapsverlof y e zorgmanager tabata cu vakantie. Pa por a haya Tina Duinkerk yega hospital ta demostra ki tipo di empleado e ta. A busca manera con pa bis’e yega hospital pa por a sorprende y asina aki e nurse a bay di acuerdo pa yega hospital pa motibo di yuda e zorgmanager, unda el a haya e sorpresa grandi di a resulta empleado di luna. Esey ta e tipo di empleadonan cu merece e respet di tur y mag di nomina nan den e luna special di enfermeria cual ta den luna di mei como empleado di luna.
Pa Tina Duinkerk, traha den Hospital ta algo cu semper e kier a haci. Di ta empleado di luna ta algo cu e no spera, pasobra a yama su persona pa presenta na trabou y el a haci esey sin duda, demostrando asina su dedicacion y amor pa su trabou den enfermeria. Tina a gradici tur hende cu a nomin’e y hunto a sigui e celebracion riba e dia special aki.
Ademas di e celebracion na trabou y tur e bunita palabranan, Tina Duinkerk a ricibi su weekendstay di Marriott y un gift certificate di AVC. Pabien Tina cu e bunita reconocimento aki!
