Ademas Gobierno ta conta reserva di aña pasa como entrada atrobe
ORANJESTAD, Aruba – 4 di Juni 2018: CAFT a publica nan conseho riba e presupuesto 2018 siman pasa y ta contene netamente e puntonan cu Parlamentario di Fraccion di AVP, mr. drs. Richard Arends a trece padilanti durante e tratamento di presupuesto como tambe e ley pa introduci aumento di BBO y BAZV di cual algun siman atras a “bulldoze” esaki den Parlamento.
E puntonan cu CAFT a trece padilanti entre otro e calculacion dobel di e reservanan di ATA, ta preguntanan cu Fraccion di AVP a haci. Gobierno no a contesta e preguntanan number 594 y 595, di cual ta exactamente e puntonan treci padilanti. Parlamentario Arends ta puntra con por ta posibel ta conta atrobe e reserva di aña pasa como entrada di e aña aki den e sector colectivo. Obviamente esey ta cambia e deficit.
CAFT a instrui Gobierno awor pa traha e plan financiero economico p’e proximo 4 añanan full di nobo. Tur esaki ta a base di e declaracion cu e Secretario di Estado di Hulanda a haci na salida di Rijksministeraad, di cual den 2 siman lo tin un plan di accion ta con lo bay haci pa corta 175 miyon florin prome cu 1 september 2019. Esey ta e diferencia entre e deficit di e aña aki y e surplus di 0.5%.
Meta di e Fraccion di AVP semper ta pa hiba un discusion obhetivo riba finansa publico y den e cuadro ey e partido mas grandi den e ultimo eleccion a laga publica algun nota riba nan pagina di Facebook pa asina tur hende por tin acceso na nan y tur esaki ta a base di datonan publico. Fraccion di AVP a confirma cu e crisisheffing no ta nada mas cu un “coalitieheffing”. Esaki ta un aumento di impuesto pa por financia gastonan excesivo di e.o. personal y gastonan coriente di oficina. Esaki ta wordo confirma tambe door di e conseho di CAFT pa loke ta trata e maneho di presupuesto 2018.
A tira tur culpa cu e gastonan adicional ta segun e situacion cu Gobierno di AVP a laga atras. Pero Gobierno di AVP a laga su maneho “in place” y e gastonan presupuesta pa loke ta trata e cuadro financiero, ta segun e maneho di partido AVP, asina Parlamentario Arends ta indica. Esaki a wordo confirma door di CAFT, como tambe e cuentanan anual di Pais Aruba.
Den e maneho financiero nobo, e Gobierno nobo a bay atras na e norma cu na 2015 Gobierno anterior a alcansa, pero Conseho di Minister di Reino a bay di acuerdo pa tin un plan di accion cu den dos siman mester ta cla pa cubri 175 miyon. E unico forma pa logra esaki ta dor di sigui reduci gastonan adicional cu e mesun Gobierno aki a ocasiona dor di aumenta cantidad di empleadonan publico y huurmento di edificio, banda di un aumento substancial di entrada cu probablemente lo bira mas medida. E 175 miyon cu Gobierno mester cubri pa yega un surplus ta ekivalente na un aumento adicional di 3% di BBO, of un reduccion di 1/3 parti di e gastonan di personal.
Fraccion di AVP ta spera cu Gobierno lo ta transparente pa discuti e plan di accion cu Parlamento, pa e reduccion di deficit den e periodo cu Conseho di Minister di Reino a palabra.
