Home » Parlamentario Sue-Ann Ras: “Si bo kier cuestiona Parlamento, hacie di e forma corecto si!”

Parlamentario Sue-Ann Ras: “Si bo kier cuestiona Parlamento, hacie di e forma corecto si!”

by Admin
0 comment 48 views

ORANJESTAD – Si un hende (un parlamentario) kier cuestiona trabou di un parlamentario, e mester hacie di e forma corecto si. E parlamentarionan mester tin e derecho di por vocifera nan opinion tur tema cu ta rekeri atencion publico. Te hasta si ta trata riba e propio comportacion di parlamentario den parlamento. Asina parlamentario Sue-Ann Ras (MEP) ta opina y ta referi aki tambe na e.o. un articulo recien di colega parlamentario di oposicion Michael Lampe. E articulo di Lampe ta adresa e rol di e parlamentarionan di oposicion y cuestionando nos Prome Minister Evelyn Wever Croes su vision y meta di tin un parlamento nobo.
“Mi ta contento di por mira un desaroyo positivo di mi colega di fraccion di oposicion (Michael) Lampe y cu e ta haya oportunidad di vocifera su opinion, cos cu sigur no tabata pasa antes cu su coleganan durante e maneho iresponsabel y deficiente di Gobierno Eman I y II”, Ras a bisa. E ta referi na e periodo unda cu Parlamento tabata complice di tur e desaster social, educacional, cultural, criminal y financiero di nos pais.
Segun Ras, como parlamentario, bo tin e tarea importante pa representa bo pueblo y mas cu claro, ta critico y analitico unda mester, pa por coregi y conduci gobierno den un bon maneho. Hisamento di nivel den Parlamento ta birando un realidad, mirando cu nos propio Prome Minister Wever Croes ta duna nos espacio pa ta critico y vocifera nos mal contento. No manera tabata e caso di e ex Prome Minister Eman, cu tabata maneha y manipula pueblo completo cu mentira, corupcion y falta di liderazgo, pa asumi e funcion como lider maximo di su pais”, Ras a bisa. En bes Eman a continua cu su locura di inverti den e proyectonan PPP y crea un debe cu e mes a grita den bos halto, di ta orguyoso di dje y cu e lo paga. Na momento cu e gobierno actual a drenta, no por lubida cu ta e ora numa, tur e puyitonan a cuminsa sali for di macuto. Un mal maneho durante 8 aña, cu sosten di e Parlamento anterior cu no tabatin e curashi y determinacion pa asumi nan rol como representante di pueblo pa cuestiona tur e gastamento di placa den e proyectonan PPP. Proyectonan cu na final di dia ta costa pais Aruba alrededor di 80 miyon y cu un periodo di pago di 20 aña. Aki ta unda cu e Parlamento e tempo ey mester tabatin e curashi pa haci pregunta y exigi e ex ministernan e contestanan realistico y hopi documento, pa tin garantia y controla loke ta pasando cu placa di pueblo.”
Ta cuestionabel segun Ras, con un parlamentario cu a demostra un silencio total durante varios reunion publico, mientras esey tabata bo momento pa vocifera bo preocupacion- y preguntanan. “No ora cu algo a pasa caba, anto e ora bo ta opta pa bay den media y sconde tras di pen”, Ras a sigui bisa. E cambio den parlamento a cuminsa, na momento cu e fraccion di MEP, a entrega 2 ley, cu pa hopi aña tabata un topico iritante, desafiante y preocupante, esta e ley di screen e ministernan y tambe financiamento di partido politico. “Nos tin un rol proactivo y uno cu realmente ta para pa bienestar di su pueblo”, Ras a bisa. El a haya ta bon pa recorda su colega Lampe, cu e implementacion di aumento di impuesto di crisis, ta un resultado directo di e accionnan descabeya y fuera di control, haci pa su propio gobierno, Ras a sigui bisa. “Y no manera cu Lampe ta pretende”, e parlamentario di MEP a finalisa bisando.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio