ORANJESTAD – Departamento di Obra Publico ta informa pueblo di Aruba en general cu diaranson ultimo dia 30 di mei 2018 un accion di departamento di riolering a tuma luga na altura di Paddock Restaurant riba LG Smith Blvd.
Ta asina cu nos a ricibi un yamada cu awa di riool ta saliendo for di un baki di control y esaki a causa un holo desagradabel den vecindario. Mesora nos a mobilisa nos ekiponan y personal pa bay atende cu e situacion. A bin constata cu tabata tin azeta di cushina den e riolering y esey a causa e blokeo y holo desagrabel. Mesora nos ekipo y personal a traha pa soluciona e problema.
Nos ta pidi tur persona pa no tira azeta of otro tipo di kimico den e tuberia di riool pa preveni y evita un blokeo.
Nos tin cu menciona tambe cu awe dia 1 di juni 2018, e temporada di horcan a cuminsa. Teniendo cuenta cu esaki, e departamento di riolering a haci tur e rooil y pasada grandi di awacero limpi p’e awa por bay su destino.
Por ultimo, nos kier a menciona cu e mantencion di nos rooinan ta di suma importancia. Di e manera aki nos ta evita cu awa por keda para y crea inundacion na cierto areanan. Nos a pidi tur hende pa yuda tene nos rooinan limpi y NO tira sushi den e rooinan.
Areanan cu DOW ta mantene pa añanan caba ta: Rooi Manonchi, Mahuma, Noord, Palm Beach, Matadera, Sasaki, Zeewijk , Noord Cura Cabay, Brazil, St. Cruz y den area di Kooyman. Akinan tin un paar di nos “adernan grandi” cu nos ekipo ta haci limpi pa asina prepara pa e temporada di horcan.
DOW ta spera cu por conta cu comunidad su cooperacion y comprension.