Diaranson pa mas o menos 7’or y 15, presencia di polis ta wordo pidi na Arashi, na momento cu un kayak cu dos turista riba dje no a yega tera.
Na yegada e polisnan ta compronde via e tourguide, cu den e tour tabata tin 5 kayak y 4 a yega tera y nan falta un kayak cu aparentemente lo a bolter y nan no por a yega tera.
Mesora a pidi ayudo di maritiem politie, na e sitio nan a bin compronde cu e personanan riba e kayak a cansa di roei y cu consecuencia cu e kayak a drief bay mas afo. Un di e personanan tabata den lama ta drief, e tabata tin su life jacket bisti y e otro tabata riba e kayak.
E polisnan na e sitio a pidi un boto cu tabata den cercania pa yuda nan y mesora nan a coopera y a rescata e kayak cu e dos turistanan y a trecenan tera.
Pa un rato mas cu claro nan a pasa den un tension, pero na final ambos tawata sano y salvo. Ultimo dianan e biento ariba nos isla ta basta duro, y ta algo cu sigur mester tene bon cuenta cune ora di subi lama.