Parlamento a trata y aproba e ley di ‘coalitieheffing’ caminda a cambia diferente ley y un di esunnan mas impactante cu a wordo cambia, ta e aumento di BBO y BAZV cu lo bay afecta tur hende aki na Aruba.
Parlamentario Marlon Sneek ta mustra cu gobierno di MEP-POR-RED y nan fraccion den Parlamento, a mustra bon cla durante di henter e proceso di preparacion, tratamento y aprobacion di e coalitieheffing, cu nan no tin ningun clase di piedad cu pueblo di Aruba.
“No ta cos di awo pero for di algun tempo caba partido MEP, principalmente pa medio di su lider Minister Presidente, a bin ta kibrando tur promesa cu a ser haci na pueblo durante di campaña, confirmando bes tras di bes, cu interes di pueblo no ta na prome luga pa e partido aki y pa e gobierno di Evelyne WeverCroes.
Gobierno di e lider di MEP tin mester di 125 miyon florin, pa nan gasta cu nan amigo y famianan, pero a implementa tur clase di maniobra, tur clase di triki politico, pa trata di convence pueblo cu loke nan ta haci ta pa motibo di e supuesto desaster financiero cu gobierno anterior a laga atras.
Sinembargo lo keda demostra cu tur e argumentonan aki ta sin base sigur ora cu analisa tur cuenta anual cu a wordo presenta y cu lo bin dilanti ainda, caminda ta confirma cu gobierno di AVP a hiba un maneho responsabel dirigi riba desaroyo general di nos pais.
Net e siman aki caminda gobierno di coalicion ta insisti cu tin un desaster financiero, director di AZV ta confirma cu den 2017 AZV a cera aña c’un saldo positivo di 30 miyon florin, pues cu gobierno no mester duna AZV ningun placa adicional, pero gobierno ta sigui insisti cu e tin mester di miyones pa yuda AZV.
No solamente e mentira aki pero pensionadonan tambe a haya un fastball durante tratamento di e ley aki ora cu gobierno a broma cu nan lo haya un reduccion di nan prima di AZV di 10% te cu 6.5% cu lo brinda pensionadonan un espacio financiero adicional pero Minister di Finansa a confirma na Parlamento cu e reduccion di pago di prima aki ta wordo paga pa SVB, consecuentemente e reduccion aki ta bay pa SVB y no e pensionado.
Sinembargo e pensionadonan aki dor di e decision di gobierno aki a perde nan reparatietoeslag pues nan entrada mensual a wordo reduci dor di e decision aki pero Prome Minister a broma riba su facebook prome cu e ley a wordo aproba, felicitando pensionadonan mientras cu su colega Minister di Finansa ta conta un otro storia cu no ta cuadra cu loke e lider di MEP ta pretende.