Minister di Turismo, Salubridad Publico y Deporte, Sr. Dangui Oduber a comparti awe un noticia sumamente positivo pa cu cambio na Huisartsenpost pa yuda reduci e lista di espera na Spoedeisende hulp (SEH).
Actualmente e huisartsenpost (HAP) no ta trahando na un manera eficiente y integral. E distancia fisico entre e HAP y SEH ta stroba e comunicacion. Esaki ta trece cu pashentnan tin momentonan ta warda “innecesariamente” pa oranan largo, prome cu por hasi un “triage” y consecuentemente wordo atendi adecuadamente. Un ehempel ta na momento cu un pashent bai HAP e tin di warda eynan pa dokter wak e y despues si e tin mester di pasa SEH pa bai saca potret of otro testnan elo mester bolbe warda pa un “triage”. Un di e kehonan di mas grandi ta e funcionamento di SEH caminda e ora y/of lista di espera ta hopi largo.
Pa evita esaki esaki y pa trece cambio y mehoracion na SEH, e Huisartsenpost lo muda fisicamente banda di SEH desde juli 2018 y lo ta situa na e Medical Office Building caminda cu e pashent ta bai acudi su mes directamente na HAP y no na SEH. Den casonan di emergencia SEH ta keda e lugar indica pa ofrece ayudo necesario. E orario di HAP tambe lo conoce un cambio. Lo bai extende e ora di servicio di HAP te cu 00:30.
Problemanan soluciona
Actualmente e dokter di cas na HAP no tin contacto direct cu specialistanan na Spoed Eisende Hulp. Door di hasi e cambio di muda HAP pa e Medical Office Building banda di SEH, lo kibra e barera di comunicacion aki pa asina por traha mas eficiente.
Ora y/of lista di espera na SEH ta largo pa motibo cu hopi hende ta bai SEH cu casonan medico cu no ta di emergencia. Aworakinan tur persona mester pasa HAP prome y consecuentemente si ta necesario un verwijzing lo wordo hasi pa bai SEH. Den casonan specifico di emergencia lo pasa dibiaha pa SEH.
E orarionan actual di e huisartsenpost ta di 18:30 pa 22:30. Esaki lo bay wordo extendi te cu 00:30. E cambio aki tambe lo aporta na e cantidad di personanan cu ta bai SEH y lo reduci e lista di espera na SEH.
Asina ki nos ta hasi un stap den mehora nos cuido medico y mehora e servicio medico cu nos ta brinda na comunidad di Aruba. Cu e cambionan aki Minister Dangui Oduber ta cumpli cu programa di gobernacion caminda e ser humano ta central.