Un reunion hopi fructifero cu ideanan cu ta benificia nos pais
Minister President Evelyn Wever-Croes ta na Costa Rica pa e acto di inauguracion di Presidente Carlos Alvarado Quesada diamars 8 di mei.
Den cuadro di e bishita aki, e mandatario a reuni cu Staf y Personal di Embahada di Reino na Costa Rica. Minister President a haya un splicacion amplio riba tur locual e Embahada ta haci y a haya e oportunidad pa splica e vision di Gobierno nobo di Aruba.
Embahador di Reino na Costa Rica, señor Peter Derrick Hof y Minister President a intercambia varios punto y idea con e Embahada por yuda e Gobierno di Aruba. Un reunion cu tawata sumamente fructifero pa nos pais.
Minister President a haci un apelacion na Embahada di Reino na Costa Rica pa yuda tambe den atrae inversionistanan y trece actividadnan economico Aruba. E Embahada ta hopi activo riba e tereno aki y ta mira tambe hopi beneficio pa Embahada, pa Reino y especialmente pa Aruba.
