Parlamentario Endy Croes a baha fuertemente den conferencia di prensa riba e mucha manda di Mike Eman, esta Richard Arends. Croes a splica cu e lo mustra pueblo dicon Richard Arends no tin credibilidad mas. AVP ta conoci pa gusta gaña y manipula pueblo. Parlamentario Richard Arends ta e mesun persona cu tabata cobra 15 mil pa luna como consehero pero na Augustus 2014 a sinti cu esey no ta suficiente y a lanta un compania cu yama Horizon Consultancy y a strica mas di 500 mil (mei Miyon florin) di pueblo pa conseha Mike Eman y despues a bira Minister y awe Parlamentario. Su so a strica rond di 2 MIYON florin di e pais aki! Un persona asina no tin Aruba na pecho y sigur no ta di confia nunca mas cu placa di pueblo.
Richard tin hopi cos di sconde
Durante reunion publico tanto Endy Croes, Edgard Vrolijk y Hendrik Tevreden a pidi Presidente di Parlamento un punt van orde. Tur tres Parlamentario a vocifera un peticion na Richard Arends riba mesun topico. Di acuerdo cu un Ley LV persoonsgebonden gegevens e persona encuestion mester duna permiso pa asina Minister Presidente den e caso aki por informa Parlamento di e suma corecto y concreto cu Richard a cobra via su Horizon Consultancy pa conseha Mike Eman. Na tur tres ocasion Richard Arends a nenga rotundamente pa coopera. Claramente mustrando cu e no ta un persona integro y talves tin hopi cos pa sconde y no kier pa pueblo sa.
Promesanan falso di AVP
Parlamentario Endy Croes a presenta na conferencia di prensa cu plan di campaña 2009 di AVP ‘Plan Aruba Ariba’ pa ilustra pueblo e engañonan di Richard Arends, Mike Eman y AVP. Richard Arends hunto cu CDA, zusterpartij di AVP, a skirbi rapport FESCA economische ontwikkeling van Aruba y alaves a traha e Plan Aruba Ariba. Locual mi kier mustra awe ta con AVP a gaña y manipula henter un pueblo cu nan promesanan falso cual nunca a wordo cumpli. Adhunto algun ehempel. Riba pagina 4, “Pa loke ta turismo, ya no tin sentido pa bin cu mas camber”. Nos ta corda con Juan David y Paul Croes a bay protesta contra Ritz Calton. Resultado: Coalicion nobo a confronta su mes cu permiso firma pa AVP pa construi 7300 kamber di Hotel extra. Pagina 5, “Elimina BBO cuminsando 1 di Januari 2010”. Resultado: Na final di gobernacion di AVP na November 2017, BBO/BAZV ta 3.5%, pues mas halto cu nan a hay’e. Pagina 8, “Mantene cantidad di minister maximal na (7) y reduci e personal cu ta sostene minister na un cantidad minimo”. Resultado: Na 2013 pa complace Juan David y Paul Croes a aumenta ministernan na 9 y coordinadornan a subi di 100 pa mas cu 400.
Mas di e promesanan falso
Pagina 8, “Traha un presupuesto di mas aña sin deficit desde 2011”. Resultado: Nan a redobla e debe di pais Aruba di 2.1 BIYON pa 4.2 BIYON y a mas cu redobla e deficit anual alcansando 9.3% di GDP na 2014 cual ta riba 400 MIYON di deficit den un aña te cu Hulanda a cay aden mediante un KB unda Mike a bay den welga di hamber y fanaticonan cu no ta compronde e materia a bay bati wea y tabata grita “firma awor”. Dieptriest. Pagina 13, “Diseña un programa pa spar coriente pa tur negoshi y cas na Aruba”. Resultado: Mike De Meza a hedge bari di fuel na $90 dollar pa bari mientras prijs a baha mundialmente y mundo henter tabata paga $30 dollar pa bari. E decision aki a costa pueblo alrededor di 300 miyon florin. Ora pueblo a bay protesta AVP a manda Riot Comando bati e humilde pueblo 1 di october 2014. Pagina 20, “AVP lo concentra pa mantene e edad di pensioen na 60 aña”. Resultado: AVP a pasa pueblo un cuchiu den lomba hisando e edad di pensioen den un solo tiro di 60 pa 65 aña cabando alaves cu speransa di hopi cu tabata yegando edad di pensioen.
Asina Parlamentario Croes kier a ilustra pueblo cu e puro berdad con Richard Arends, Mike Eman y AVP a manipula pueblo. Credibilidad di politiconan asina ta na tera y nan no lo por bolbe nunca mas, Parlamentario Endy Croes ta termina splicando.
