Pa loke ta trata presupuesto di pais Aruba, lider di fraccion di MEP, sr. Rocco Tjon MBA, kier a toca 3 punto cu a resalta. Na prome lugar ta trata un presupuesto realistico y cu, segun CAFT, ta e prome paso signicativo pa resolve e situacion financiero, social y economico. Na di dos lugar e falta di un traspaso di mando madura ta sobresali y esaki no ta na bienestar di e departamentonan y pais Aruba. Y por ultimo durante reunion publico, unanimamente a aproba riba 50 mocion.
PRESUPUESTO REALISTICO
2 di februari 2018 CAFT a informa parlamento di Aruba cu pa loke ta presupuesto 2017 lo cera cu un deficit di 5.5%. Esaki debi na entradanan artificial cu a wordo uza pa yega na presupuesto 2017. Entradanan aki no a drenta te cu dia di awe. E presupuesto actual conoce un deficit di 3.0%. Y segun e “herstelpad” e debe nacional lo baha te na 86% na aña 2021.
MOCIONNAN
Nos no kier cay den e politica anticua di fraccion di AVP pa discuti kiko e cantidad di mocionnan ta nifica. Lamentabel ta si cu fraccion di AVP ta urgi gobierno pa haci cierto cosnan, ta bay unanimamente di acuerdo cu fraccion di MEP pa loke ta riba 50 mocion, pero ta vota contra presupuesto. Remarcabel ta cu coleganan di AVP mester compronde cu sin un presupuesto no por ehecuta e mocionnan cu nan mes a vota na fabor.
Ta lamenta cu no por a conta cu sosten unanime pa loke ta trata mocion 63, entrega door di lider di fraccion di MEP y parlamentaria Setty Yarzagaray, caminda ta urgi gobierno pa (1) den augustus bin parlamento y duna un up-date pa loke ta desaroyo di presupuesto 2018. (2) entrega presupuesto 2019 mas tarda 1 di september y (3) haci un investigacion pa na un manera responsabel y structural baha gasto di gobierno pa loke ta personal, energia, “software licenties” ,”wagenpark kosten” y gastonan relaciona cu telecomunicacion.
TRASPASO MADURA
Por ultimo kier remarca cu e luna aki lo haci entrega di un ley di initiativa cu lo garantisa un traspaso di mando madura y responsabel. Na final di dia politiconan tey pa sirbi pueblo y traha na bienestar di e diferente departamentonan gubernamental.