Diasabra mainta trempan e team di “Train Hard Fight Smart” a cuminsa cu preparacion na Grape Field. Training a cuminsa ariba un tono mas halto pa e eventonan cu tin dilanti porta, manera e Gold Coast Taekwondo Cup, Open di Surinam y Aruba Open.
Awo cu un otro di e rumannan Klabér ta drentando den e parti di adulto y e contrincantenan ta un tap mas cu nan, ta pone cu a cuminsa prepara pa e etapa aki. Mester busca contrincantenan den exterior. Surinam Open ta un di e prome campeonatonan di adulto na unda cu nan por cuminsa midi nan mes. Na luna di Juli nan ta bay Europa pa training y campeonato y ex campeon Mundial y Coach Olimpico Henk Meijer ta bay guianan. Tur esaki ta pa prepara nan pa e Open di Costa Rica cu ta un G1.
Brazil Taekwondo Stichting ta conoci pa produci atletanan elite. Brazil Taekwondo Stichting ta conta cu atletanan den categoria manera cadet, junior y awo Adulto. Nos meta ta pa yega na top, e ta un caminda largo pero nos lo yega cu e Poder di Dios cu semper tey hunto cu nos.