Den nan actonan di desesperacion y pa hustifica nan maldad cu nan a comete contra nos pueblo durante nan ultimo periodo di gobernacion, Mike Eman y AVP cada biaha ta trece padilanti cu tabata e gobiernonan di MEP den pasado a aumenta e derechonan di importacion (invoerrechten) riba lomba di pueblo. Cu esaki nan kier insinua cu nunca den e gobernacionnan di AVP nan a yega di aumenta invoerrechten, cu ta un medida pa sostene e caha di gobierno na momento cu esaki ta necesario. Ta p’esey MEP ta trece dos ehempel padilanti pa mustra pueblo con Mike Eman y AVP cada vez kier tapa e berdad pa loke ta nan maneho di aumenta invoerrechten y accijnzen den e periodonan di nan gobernacion.
Aumento di invoerrechten na 1987
Na 1987 – apenas cu nan tabata 1 aña y mey den gobernacion – Gabinete Henny Eman mediante un Ley di 24 di september 1987 (Afkondigingsblad A.B. 1987 No. 99) a introduci un gran cantidad di medidanan pa subi entradanan di Gobierno (inkomstenverruimende maatregelen) relaciona cu e situacion financiero di Aruba. E medidanan cu gobierno di AVP a introduci e tempo ey cu forza retroactivo te 1 di Januari 1987 tabata lo siguiente: Aumento di accijns riba cerbes (art.1); Aumento di accijns riba bebida alcoholico (art.2); Aumento di accijns riba sigaria tanto di fabricacion local como importa (art.3); Aumento di accijns riba gasolin, kerosin y diesel (art.4); Aumento di invoerrechten di 5,5% pa 7,5 % y Aumento di invoerrechten riba auto (art.5); Aumento di prijs di stampianan (art.6); Aumento di numbernan di auto y botonan di motor (art.7) y Aumento di belasting di salida na Aeropuerto (art.8).
Aumento di invoerrechten na 1999
Na maart 1999 Gabinete Henny Eman a introduci un pakete di medida (“3e pakket bezuiningingsmaatregelen”) y den cual nan a ranca no menos cu 140 miyon florin for di pueblo p’asina nan por a sigui cu nan politica di deroche di placa. Banco Central ta afirma esey den su relato anual di 1998 caminda nan ta declara: “door de bezuinigingsmaatregelen moeten volgens plan in 1999 in vergelijking met 1998 Afl. 100 miljoen hogere inkomsten en Afl. 40 miljoen lagere uitgaven worden gerealiseerd”. Den e pakete di medidanan aki cu a genera den total 140 miyon florin ta inclui tambe aumento drastico di invoerrechten y cual palabra semper a ser mira como palabra malo pa partido AVP, pero cu nan semper den nan gobernacion a probecha di e invoerrechten aki.
Fuera di esey, na 1999 gabinete Eman tabatin pendiente tambe pa introduci un di 4 pakete di medida (“4e pakket bezuinigingsmaatregelen”), caminda nan tabatin e intencion pa hipoteca te hasta nos santananan, schoolnan, edificionan di gobierno y bende nos patrimonionan nacional manera entre otro Setar, p’asina nan por a sigui cu nan fiestamento cu placa di pueblo. Pero danki Dios cu pueblo a core cu nan net na tempo for di gobernacion y p’asina impidi e malechornan aki di ehecuta e di cuater pakete di medida aki.
Pues cu e ehempelnan aki tambe MEP a bolbe desenmascara Mike Eman y AVP pa loke ta nan mentiranan constante relaciona cu e topico di aumento di invoerrechten y pa cual nan kier sigui demonisa pueblo contra partido MEP. Pero un biaha mas: a otro perro con ese hueso!
