Recientemente e titular di e carteranan di Transporte, Comunicacion y Sector Primario, a anuncia algun cambio pa loke ta e maneho di companianan cu ta huur automobil, conoci como ‘Car Rentals’.
Minister Romero ta di opinion cu pa hopi aña caba e maneho pa cu companianan cu ta huur automobil no tabata efectivo, y hasta por bisa cu e tabata inhusto y negligente.
Despues di a conduci varios analisis, a logra bin cu un formula di maneho cu lo beneficia tanto e companianan ‘Car Rentals’, como tambe lo ta positivo pa Gobierno.
A hasi un evaluacion riba e impuesto di Medio Ambiente (Environmental Tax) cu tin imponi riba companianan cu ta huur auto.
Den opinion di Minister Romero, un impuesto di e indole aki ta traduci den desigualdad pa cu e companianan ‘Car Rental’, cu ta ofreciendo nan servicio principalmente na nos turistanan. Como tal, Gobierno a aproba eliminacion di e asina yama ‘Environmental Tax’ pa cu e companianan cu ta huur vehiculo.
Un otro area cu tambe a conoce cambio ta e maneho pa cu condicionnan di e permiso duna na e companianan cu ta huur automobil.
Actualmente e condicionnan di permiso pa cu ‘Car Rentals’ ta implica cu nan fleta di auto mester wordo cambia cada 5 aña. Tumando na cuenta cu companianan di huur automobil ta hasi inversionnan cu ta sobrepasa 100 mil florin, renobacion di nan fleta cada pasa 5 aña ta un peso enorme y mas ainda si ta trata di autonan di hopi balor.
Ministerio di Transporte a dicidi di introduci 3 ‘bracket’ como condicion pa cambio/renobacion di fleta di vehiculo pa ‘Car Rentals’:
E prome bracket di balor pa vehiculonan lo oscila entre 0 pa 50 mil florin.
Vehiculonan cu balor di entre 50 mil pa 70 mil florin, lo tin di wordo cambia cada 6 aña.
Vehiculonan cu balor di 70 mil florin y mas, lo rekeri pa wordo cambia cada 7 aña.
Di e manera aki Minister Chris Romero ta incentiva nos comerciantenan cu ta traha directamente cu e mercado turistico, y na mes momento ta keda busca formulanan pa stimula nos economia.
Ministerio di Transporte lo conoce mas cambio positivo den maneho durante aña, unda cu lo sigui implementa mas plan efectivo y factibel den e sector aki.