Jaburibari – Dialuna algo prome cu 10’or di anochi, presencia di polis ta wordo pidi na altura di Parke Curason na Jaburibari, caminda cu un hobencito di 15 aña lo a wordo maltrata.
E problema a inicia, durante un wega di futbol dialuna anochi, ariba e veld di Caiquetio na Paradera.
E teamnan cu a participa tawata S.C United (Ex Jong Aruba) y e team di Bubali.
E wega no a bay den un bon ambiente, mirando cu ambos banda tabata hungando bruto, tensionnan tabata halto.
Referee aparentemente a wordo pidi na varios ocasion pa actua y si mester parti carchi cora haci esey, pero pone ordo, aparentmente segun testigonan na e wega di futbal a bisa cu lamentablemente esaki no a sosode. Cos a bay asina for di man riba veld cu despues di 40 minuut a para e wega.
E mucha homber herida, segun e Coach di su team a comenta, cu e victima no a ni hunga y no tabata tin nada di haber, no tabata den ningun problema durante wega. Aparentemente e victima y e agresor lo tabata tin un problema di basta tempo andando y ayera cu tensionnan tabata halto, e problema a yega asina leu.
E victima y su amigo despues di wega a subi nan bais y a bay cas, na caminda pa cas nan a wordo sorprendi pa un grupo entre nan un of mas hungador di e otro team.
Tur esaki a tuma lugar na altura di e kashi di coriente na Parke Curason. E agresor y algun hoben mas a sconde tras di e kashi coriente y na momento cu e hobencitonan aki tabata pasando nan a sali aribanan y a sorprende nan.
Un di e hungandornan di e team opositor a dal e hoben di 15 aña aki cu un baranca den su cabes y segun testigonan lo a mira , dos otro hoben cu tabata hunto cu e agresor cu cuchiu den man.
Ora e hoben a haya e golpi di e baranca, ela cana bay pariba di caminda y a bay drumi ariba yerba wardando ayudo, ariba e yerba por a wak basta sanger.
E hoben agresor aparentemente ta un persona problematico y ta varios biaha caba lo a wordo geschors pero no ta cambia.
Arubaanse Voetbal Bond mester actua contra tur hungador agresivo y problematico especialmente esun aki cu pa 4 biaha caba elo a wordo geschors y no ta siña su les. Ela bay asina leu di agredi un otro hungador pa motibo di ta onsportief y problematico.
Kiko lo a pasa si ela mata e hoben aki ?
Kiko e caso aki lo wordo considera ? Departamento tecnico di polis tambe a presenta, pa asina saca potret, mirando cu ta trata di menor di edad e caso aki a wordo poni den man di recherchenan di KJZP.
Nos a compronde cu ultimamente tin hopi problema di agresion durante weganan di futbol, deporte mester ta algo sano y ta un hobby, cu mester por wordo practica den tur trankilidad.