Den union nos lo logra e bienestar pa nos pueblo
Dia 27 di februari ta wordo celebra dia di independencia di Republica Dominicana. E aña aki ta cumpli 174 aniversario.
Prome Minister Evelyn Wever-Croes, durante e ceremonia protocolar di dia di independencia di Republica Dominicana, a entrega un discurso na unda el a felicita y gradici e pueblo dominicano residencia na Aruba y a bisa lo siguiente:
“E fecha aki ta conmemora comienso di e guera contra Haiti pa independencia di Republica Dominicana, despues cu Haiti a ocupa Republica Domincana desde 1822. Na Republica Dominicana e fecha aki ta wordo celebra na grandi, y aki na Aruba tambe. Nos na Aruba por identifica nos tambe den un lucha similar.
E lasonan entre Aruba y Santo Domingo ta hopi estrecho y ta bay hopi tempo atras. Lasonan familiar, cultural y economico.
Pa duna un ehempel, simple, pero di hopi significacion.
Na Republica Dominicana tin un caya dedica na nos Libertador Betico Croes, e prome caya na mundo dedica na betico Croes. Despues a sigui e caya y e plaza aki na Aruba y na Boneiro cu ta carga su nomber. Esaki ta muestra di e respet y e aprecio mutuo cu tabata tin entre lidernan di nos pais y lidernan di Republica Dominicana.
Pesey e hecho cu awor e comunidad Dominicano tambe ta haya un Plaza pa conmemora e heroe di e pais, ta significativo. Esaki ta estrecha e lasonan mas ainda entre Aruba y Republica Dominicana.
Na Aruba nos tin un comunidad di Republica Dominicana ta biba pa hopi aña caba. Hopi ta esnan cu a laga nan hogar y nan famia atras, pa bin yuda nos desaroya nos economia, y a bin haci Aruba nan pais di residencia. Manera cu sr. Betico Croes den feliz memoria, a bisa: Arubiano no ta solamente esun cu a nace na Aruba. Si bo a nace na otro pais, y bo a haci Aruba bo hogar, bo tambe ta Arubiano.
Riba dia di Independencia di Republica Dominicana, mi ta felicita tur Dominicano residencia na Aruba, y mi ta gradici tur cu a laga nan hogar, y bin establece nan mes y nan famia na Aruba, pa yuda nos desaroya nos economia.
Hunto cu nos, boso a experiencia bon tempo y menos bon tempo na Aruba, y boso a keda. Determina den e lucha pa hiba nos pais padilanti.
Nos pais ta enfrentando retonan sumamente grandi. Retonan financiero. Retonan social. Retonan den relacionnan exterior cu nos pais bisiña, retonan economico cu e ‘slow down’ di e refineria.
Nos no mester teme e retonan aki. Den pasado nos pais a pasa den retonan similar. Mescos cu den pasado, e biaha aki tambe nos lo vence, contal cu nos ta uni. Den union nos lo vence tur e reto y desafionan, y den union nos lo vence tur obstaculo cu crusa den nos caminda. Y ta den union nos lo logra e bienestar pa nos pueblo, cu tanto nos ta anhela. Pabien!”