Minister Glenbert Croes recientemente a anuncia e plan laboral nobo cu a keda aproba pa Conseho di Minister den cual ta duna Inspeccion di Labor e autoridad di supervision, control y sancion.
Ta hopi kehonan substancia ta yegando na su bureau di abuso laboral na tur nivel, den tur sector y di tur indole. Algun di e kehonan ta por ehempel hendenan trahando riba dianan nacional cu ta dianan liber pero cu no ta ricibi pago conforme e ley laboral. Tambe ta yegando keho cerca e mandatario cu tin companianan cu ta obliga nan empleadonan traha mas largo cu ta normal y aceptabel, sin cu ta paga overtime. Ta tuma hende pa un cierto funcion pero ta pone nan chapi etc. Si e empleado nenga e ta ricibi e menasa cu si e no cumpli cu instruccion di su hefe di trabou cu lo mand’e cas. Pa Minister Glenbert Croes e intimidacion aki ta inaceptabel.
Otro motibo cu a conduci e mandatario na duna instruccion na e Inspector di Labor, ta e keho cu tin hopi compania cu ta prefera emplea un persona ilegal djis pa pag’e lo minimo mientras cu localmente tin hopi hende sin trabou. Y cu localmente Minister ta referi na tur esnan cu tin nacionalidad Hulandes pero tambe na esnan cu ta legalmente estableci na Aruba caba. Tur hunto ta forma e comunidad laboral di Aruba.
Esaki ta algun dje hopi motibonan pakico Minister a duna Inspeccion di Labor e instruccion pa supervisa, controla y eventualmente sanciona unda tin violacion di ley laboral di Aruba. Hopi a papia, ningun a haci. Pero manera e mandatario a expresa; “we have to lead by example, we have to walk our talk”. E plan aki a drenta na vigor y ta valido pa un y tur sin excepcion.
E siman aki Aruba tabata testigo di e prome frutonan di e maneho aki di Minister Glenbert Croes cu desde su toma di posicion a declara bon cla, cu trahadornan local p’e tin tur prioridad y ta na prome lugar.
Cu e decision aki di e mandatario, e wega di emplea un ilegal a caba. Ilegalidad laboral ta fomenta e fenomeno di “cheap labor” mientras cu na Aruba specialmente bou di nos hobennan e desempleo ta haltisimo. Desempleo ta conduci na frustracion cu ta conduci na problema social cu por desemboca den problema cu husticia. Esaki Glenbert Croes kier pone un paro na dje.