E celebracion di e fiesta cultural mas grandi di Aruba, esta Carnaval ta yegando na su punto culminante cu e ultimo paradanan grandi. Aruba por mira atras riba un temporada bunita.
Mi ta desea cu e ultimo dianan aki nos pueblo por sigui gosa y celebra di nos dushi Carnaval manera ta Aruba so sa celebra Carnaval. Celebra e dianan aki sanamente y responsablemente. Gosa hopi pero gosa na midi y conciente. Disfruta pero respeta tur otro tambe.
Mi ta haci un apelacion special na tur mayor cu ta hiba nan muchanan pa wak e paradanan pa tene nan semper na bista. Duna nan bon di come y bebe. Rayonan di solo por causa hopi daño. Zorg pa tin sunblock. Zonido fuerte por haci hopi daño na oido. Cuida nan oido cu earplugs. Evita di hiba muchanan chikito wak carnival pasobra esaki ta molester pa nan door di e zonido y solo fuerte.
Mi ta gradici di curazon tur esnan cu ta engrandece nos Carnaval. Organisadornan, Participantenan, Lidernan di Grupo, Bandanan Musical. Tur esnan cu ta traha pa haci nos Carnaval sigur, cuerpo policial, ambulance, Rode Kruis, DOW, Serlimar entre otro. Danki na boso tur cu ta haci e temporada aki asina bunita y festivo. Pabien Aruba cu Carnaval 64.