Home Politics Rudy Richardson di MEP: “Fool me once, Shame on You. Fool me...

Rudy Richardson di MEP: “Fool me once, Shame on You. Fool me twice, Shame on Me”

SHARE

Cu gran asombro e realidad di e traicion di partido AVP lidera pa Mike Eman y nan candidato di San Nicolas, Mike de Meza un bes mas a laga e districto den un decadencia structural. Desde 2009 Mike de Meza a ocupa e puesto di Minister di Finansa unda a triplifica e debe nacional den 4 aña (2013-2017) algo cu niun gobierno a haci den 33 aña di Status Aparte (1986-2018). Consecuentemente nos pais mester a entrega un gran parti di nos autonomia financiero. Enbes nos Parlamento debati, ahusta y aproba nos presupuesto nacional, esaki a wordo haci pa un grupo di experto riba finansa publico yama Caft, imponi pa gobierno Hulandes pa frena e mal maneho di Gabinete Mike Eman. Otro muestra di e falta di seriedad di partido AVP, despues cu Mike Eman a hiba un welga di hamber di un siman cu por cierto tawata puro show y alabes un berguensa nacional pa su falta di seriedad pa atende cu interes di nos pais.

 

Incentivo fiscal

Sr. de Meza a core sali di dicho funcion na 2013 y a sigui pa Minister di Economia unda pa tres aña consecutivo a pronostica crecemento economico falso hunto cu su coordinador principal Richard Arends. Aruba su economia a stanca completamente unda poder di compra a bira nulo cu un debe nacional astronomico. Ta den e periodo aki Mike de Meza a bin cu e maneho di duna San Nicolas y vecindario un “incentivo fiscal” pero esaki nunca a yega Parlamento cu su debido structura. Mi a cuestiona e incentivo fiscal pa San Nicolas varios biaha como candidato politico pafor di Parlamento di Aruba pero niun hende di partido AVP, ni den Parlamento of pafo no a duna esaki importancia. E ultimo 9 luna di Gabinete Mike Eman II, Mike de Meza a bira Minister di Turismo y su coordinador principal  Richard Arends a bira Minister di Economia. Un tactica di Mike Eman pa purba minimilisa e decadencia di e partido berde cu a malusa fondonan publico pa cumpra voto segun e cuentanan anual (2013) di pais Aruba.

 

Realidad despues di 8 aña

Minister actual di Finansa, Economia y Cultura, Xiomara Ruiz Maduro den conferencia di prensa ta trece padilanti cu Aruba a haya reclamo di Economic Cooperation & Development (OECD) di Union Europeo (EU) cu Aruba ta practica discriminacion riba tereno fiscal y si no haci algo cu e maneho aki, nos pais lo wordo buta riba un lista negativo cu lo perhudica nos pais mas aun mirando cu nos economia mester di tur empuhe di inversionistanan di afo, pues Foreign Direct Investment (FDI). Algo cu e gobierno anterior no a haci pero a hiba un maneho di crea debe y mas debe. Di biaha partido AVP a cuminsa manda nan activistanan radio emisora y pa colmo de los colmos e coordinador principal ex-Minister di Economia Richard Arends durante 2009-2017 a cuminsa skirbi articulo den medionan di comunicacion bruhando tera pa consumo politico.

 

Ultimatum di OECD

Desde 12 di juni 2017, ex-(vak) Minister di Finansa, Angel Bermudez a wordo notifica cu e incentivonan fiscal ta negativo y contra e tratado cu Aruba tin cu Union Europeo. Logico, partido AVP lidera pa Mike Eman no a haci net nada pasobra pa nan San Nicolas ta djis gusta “fiesta”. E ultimo dos añanan tawata tin 6 fiesta cu e supuesto Re-apertura di nos Refineria cu te awe ta CERA. Pa Mike Eman, San Nicolas no merece e debido atencion pa progreso economico manera e resto di Aruba. Dia 23 di october 2017 a bolbe hala atencion di e Gabinete Mike Eman, demisionario na e momento ey, pero nan no a haci net nada. Consecuentemente 21 di november Gabinete Evelyn Wever Croes cu a huramenta riba 17 di november 2017 a haya un ultimatum di OECD pa hala e incentivonan fiscal aden of lo buta pais Aruba riba e “lista negativo”, entrante 1 februari 2018. Un bes mas partido AVP ta bay den historia como un partido traicionero pasobra Mike Eman y Mike de Meza tin votonan preferencial den eleccion di 2017 y Richard Arends tabata un Parlamentario den fraccion di AVP 2017-2021 lagando San Nicolas den un decadencia structural pero mas aun perhudicando nos pais internacionalmente.