Den e conferencia di prensa di diaranson ultimo, parlamentario Edgard Vrolijk a elabora riba algun ponencia treci padilanti den un comunicado emiti pa parlamentario Mervin Wyatt-Ras, unda e señora aki a papia masha bunita di constitucion. Sin duda cu constitucion ta duna tur parlamentario e toolnan pa entre otro controla gobierno, caminda bo tin e derecho di haci pregunta y tambe controla y aproba presupuesto.
Berguensa
Sinembargo tabata un berguensa pa scucha den e reunionnan cu Algemene Rekenkamer, Raad van Advies y CAFT, con e instancianan aki a bati riba dede di e mayoria di parlamento di pasado, ya cu nan a permiti pa gobierno crea deficitnan financiero asina grandi. Echo ta cu e mayoria den Parlamento mester a hunga un miho rol, pero nan a deha di haci nan trabao, siendo cu nan tabatin tur e toolnan den man pa haci esaki. E tempo ey tabata surpasa presupuesto y tabata falta di control di parti di parlamento y cual a conduci na curatela financiero na 2015. Tur e 3 instancianan menciona a trece bon cla padilanti cu parlamento di awor en adelante mester haci nan trabao drechi mediante e toolnan cu nan tin na nan disposicion.
Mentiranan di sra. Wyatt-Ras
Sr. Vrolijk a trece bon cla padilanti cu sra. Wyatt-Ras siendo den parlamento desde 2001 te ainda no ta comprende su rol como parlamentario. Su persona mester ta mas transparente posibel y papia berdad. Den su comunicado sra. Wyatt-Ras a declara cu na december ultimo e gobierno actual a fia 150 miyon florin, cual ta un mentira flagrante ya cu e presupuesto su deficit tabata 130 miyon florin. Pues diripiente el a pone un cifra di fantasia di 20 miyon florin acerca! Tambe sra. Wyatt-Ras a bisa cu e deficit financiero na 2018 ta 275 miyon y esey ta inclui e 130 miyon di e aña anterior. Esaki tambe ta un mentira, ya cu segun e ley di LAFT, 275 miyon ta e deficit premira pa 2018, pero ainda bo tin cu inclui e 130 miyon di 2017 y p’asina cumpli cu e ley di LAFT. Pues den total un suma di riba 400 miyon florin! Esaki ta forma di Emanipulacion di sra. Ras, esta di purba gaña pueblo.
Emanipulacion ta sigui
E mesun señora aki ta papia di cu MEP ta yora na CAFT y cu mihor cos cu MEP haci ta pa bay entrega e presupuesto 2018. Echo ta cu presupuesto 2018 mester a ser entrega caba dia 1 di september 2017 na parlamento y un luna prome na Raad van Advies. E tempo ey e fraccion di MEP actual no tabata sinta eynan ainda, pero ta te dia 16 november nan a drenta parlamento. Sra. Wyatt-Ras como un persona di parlamento cu experencia mester por sa miho. Esaki un biaha mas ta muestra cu nunca el a siña nada y cu e no conoce nos constitucion. Tambe den e reunion cu CAFT, sra. Wyatt-Ras a declara cu “tur gobierno ta mescos”. Si esaki ta e caso, anto su persona tambe a forma parti di tur gobernacion: Di 2001 pa 2009 como parlamentario y presidente yoron di parlamento, na 2010 e tabata e persona di versoberingswet y tambe e famoso ley cu a pasa den record di 6 minuut. Finalmente 2013-2017 caminda sra. Wyatt-Ras a yuda pa aumenta nos debe nacional for di 43% pa 87%. Pues otro muestra cu como parlamentario e no a haci su trabao drechi.
Pushi ta cuida pisca
Den e conferencia di prensa sr. Vrolijk a elabora tambe riba parlamentario Richard Arends kende a declara recientemente cu “IMF a pidi fraccion di AVP pa yuda traha un plan financiero”. Pero pa sr. Vrolijk, esaki ta mescos cu bo ta laga pushi cuida pisca! Tambe sr. Arends cu semper ta papia di deficit y situacion financiero, tabata e prome cu na careda a bandona e reunion cu CAFT ora cu cos a bira cayente. Pues aki ta falta di seriedad y madurez politico. Sin duda cu sr. Arends tambe ta parti di e desaster financiero cu a crea e deficit financiero astronomico aki.
Finalmente, sr.Vrolijk a anuncia cu pa otro siman e lo bay entrega dos ley na Parlamento, esta e ley di financiamento di partido politicio y ley di screening pa ministernan.