ORANJESTAD – Departamento di Asuntonan Economico, Comercio y Industria atrabes di Exprodesk (DEZHI), ta organisa den e periodo di februari pa mei 2018 un estudio tocante bareranan cu ta impedi exportacion. E estudio aki yama “Trade Barriers Impeding Export Readiness”.
Meta di e encuesta aki ta:
Descubri dicon negoshinan no ta exportando
Cua bareranan exportadornan existente ta haya mas significativo
Con gobierno y facilitadornan por asisti exportacion mas mihor
Identifica cua ta e factor(nan) cu a motiva exportadornan existente pa internacionalisa
E estudio ta dirigi na doñonan y/of directornan di negoshi mediano y chikito na Aruba. E negoshinan lo ta di tur sector y reparti over henter Aruba. Lo procesa tur informacion obteni di un manera completamente anonimo. E cooperacion di parti di e negoshinan mediano y chikito ta di gran importancia pa haci e estudio posibel y pa bin cu un maneho structural encuanto exportacion di productonan y servicionan for di Aruba.
Exprodesk ta un ‘Export Promotion Desk’ cu a habri su portanan recientemente cu e obhetivo pa contribui na un desaroyo economico sostenibel atrabes di e capacitacion di nos empresarionan. Pa logra esaki, Exprodesk ta brinda sosten y guia na tur empresario cu lo kier exporta nan producto of servicio door di duna consulta, training y workshop. Exprodesk ta habri pa duna consulta na tur compañia y empresario cu tin interes pa exporta nan producto y servicio entre 8:00 am y 4:30 pm di dialuna pa diabierna segun cita. Nos ta situa den edificio di Sun Plaza, riba segundo piso.
Pa mas informacion bishita nos website www.exprodesk.com y sigui nos riba pagina di facebook Exprodesk pa keda al tanto di tur actividad, specialmente e training y workshopnan cu Exprodesk tin prepara pa 2018.
Pa un cita of mas informacion por tuma contacto cu sra. Sharon Meijer via: [email protected]