Den e conferencia di prensa di dialuna ultimo, lider di fraccion di MEP, sr. Rocco Tjon a trece padilanti cu siman pasa fraccion di MEP tabatin reunionnan cu IMF, Algemene Rekenkamer (ARA), Raad van Advies, Directie Financiën y CAFT. Tur e instancianan aki a confirma cu e situacion financiero di pais Aruba ta hopi desastroso. Apesar di e echo aki, partido di oposicion a declara cu nan a logra e normanan stipula pa ley y cu segun nan ARA a constata cu nan a hiba un maneho responsabel y cu te hasta IMF lo a pidi nan pa aporta y yuda e gobierno actual cu un plan p’asina logra sana e situacion financiero. Sinembargo, e ponencianan aki a wordo desbarata completamente door di tur e instancianan menciona.
Situacion financiero desastroso
IMF: IMF a bisa cu nan ta hopi contento cu e plan cu e gobierno actual a presenta na nan. Alavez nan a duna di conoce cu e cifranan cu a wordo proyecta door di e gobierno anterior tabata irealistico y ficticio. Ta p’esey un mail a ser manda pa e persona di contacto di IMF y pidi aclaracion pa loke ta e ponencianan haci door di e partido di oposicion.
ARA: Segun e Jaarrekening di e instancia aki, nan ta conclui e gobierno anterior a hiba un maneho iresponsabel, caminda no tabatin un maneho structural pa baha gasto y hisa entrada y cual a conduci na e deficitnan financiero astronomico.
Secretario di Estado Knops: El a duna di conoce cu den su reunion cu gobierno actual e tabata hopi contento cu e plan cu a wordo presenta na dje p’asina di berdad nos por bay papia di un situacion financiero responsabel y duradero.
CAFT: CAFT a confirma cu e situacion financiero ta desastroso, caminda e debe nacional a yega na 87% di GDP. Alavez CAFT mes a bisa cu e normanan no a ser logra. Den e ley di LAFT, normanan a wordo stipula p’asina e debe nacional por baha. P’esey e pregunta di sr. Tjon ta “Si bo a logra bo normanan, con por t’asina cu bo debe nacional toch a keda subi?”.
Den e reunion cu CAFT, fraccion di MEP a haci un apelacion na e instancia aki pa tene cuenta, mirando e situacion financiero desastroso cu nos ta aden, cu lo ta mas husto pa renegocia e norma y condicionnan y p’asina pueblo no sali perhudica di e mal maneho cu a ser hiba durante e ultimo 8 añanan.
Recomendacionnan di ARA
Pa alivia e situacion di debe y percura cu un situacion asina nunca mas sosode den futuro, ARA a bin cu cierto recomendacionnan na gobierno y parlamento: Na e ministernan, ARA ta recomenda pa traha cu presupuestonan realistico y cu e ministernan mester ta dispuesto pa responsabilisa nan maneho. Pa loke ta Parlamento, ARA ta haya cu e budgetrecht mester wordo respeta y cu e parlamentarionan mester ta critico ora di controla e maneho di gobierno y tambe cu nan mester dispone di tur informacion necesario na tempo pa nan por haci nan trabao debidamente. Sr. Tjon a afirma cu parlamento lo tuma e recomendacionnan aki di ARA hopi na serio. Tambe el a trece padilanti cu e minister di Finansa actual si a contesta riba e jaarrekening di ARA, caminda el y a duna di conoce cu e gobierno actual tin tur intencion pa hiba un maneho responsabel, pa respeta e derechonan di parlamento y p’asina parlamento por ta mas proactivo y tambe critico.
Finalmente sr. Tjon a trece padilanti, accentuando cu tur instancia ya a confirma cu e gobierno actual tin un plan caba y cual ta un plan hopi bon pa sanea e situacion financiero di nos pais, cu e kier a haci un apelacion na oposicion, cu si nan tin un plan manera nan ta pretende, cu portanan di fraccion di MEP ta habri pa nan presenta e plan aki, discuti esaki y pa wak si berdad e plan cu nan tin kisas por aporta na e plan cu gobierno tin riba mesa caba.