Mester cumpli cu e obligacion di brinda servicio na comunidad
Aunke cu ainda no a logra firma un CAO cu STA
ORANJESTAD, Aruba – E luna aki tur trahado “Terminal Workers” y “Terminal Operators” di ASTEC a haya nan aumento basa riba nan prestacion individual y riba dje a haya un ‘bashi premie’ riba nan salario di luna di januari.
Gerencia di ASTEC a informa cu a dicidi esaki aunke cu no a yega na un acuerdo di contracto colectivo (CAO) nobo despues di negociacion cu sindicato STA y cu intermediacion di Mediado di Gobierno. ASTEC ta confirma cu a yega na un acuerdo riba e parti financiero pero e negociacion a pega riba e texto di e CAO mes, entre otro riba a parti di e obligacion di traha overtime. Overtime ta esencial pa e compania door cu tin e obligacion di brinda servicio na nos comunidad na cualkier momento.
Ta di suma importancia cu ora tin barco di container cu e trahadonan mester ta disponibel pa traha pa ASTEC por cumpli cu e obligacion di brinda servicio ora tin mester. E operacion actual como “Multi-Cargo Sea Terminal Operator” na Barcadera ta encera un responsabilidad grandi y ASTEC ta buscando continuamente pa atende cu e variacion enorme di peticion pa cu servicio na un manera sigur y sostenibel, segun gerencia di ASTEC.
ASTEC N.V. ta existi desde September 1983 y ta conta cu no menos di 80 empleado bon entrena pa ofrece e miho servicio posibel na tur barco di carga cu mara na nos waf. Anualmente ta descarga entre 300 pa 400 barco di carga. ASTEC N.V. ta partner cu Aruba Ports Authority (APA NV) den construccion, financiamento, operacion y mantencion di e terminal nobo di waf di carga situa na Barcadera.