Recientemente Minister di Transporte, Comunicacion y Sector Primario, sr Chris Romero, a wordo poni na altura cu e aerolinea PAWA, di Republica Dominicana, a haya un suspension operacional di 90 dia. E suspesion aki a wordo imponi pa e Hunta di Aviacion Civil na Republica Dominicana, pa motibo cu e aerolinea no ta cumpliendo debidamento cu nan compromisonan financiero na dicho pais.
E hecho cu PAWA no lo por bula pa 90 dia ta traduci den un tension y incertidumbre pa tur esnan cu ta biahando cu e aerolinea aki pa Aruba.
E tension politico cu Venezuela tin como consecuencia cu e aerolineanan Laser y Albatros haya nan obliga di disminui nan vuelonan pa nos pais.
Y tambe mester considera e instabilidad reinante cu Insel Air ta bibando, unda cu un biaha mas nan tin algun dia caba imposibilita pa bula.
Tur esaki ta crea un situacion caminda por papia di un disminucion significativo di trafico turistico pa nos isla.
Analisando tur e acontecimentonan ya menciona, Minister Romero y su ekipo di consehero, conhuntamente cu Minister di Turismo, sr. Dangui Oduber, ta sondeando e posibilidadnan cu tin pa por yega na un solucion.
Actualmente ta den combersacion cu otro aerolineanan pa mira te na unda nan lo por yega na cubri e cantidad di vuelo cu a keda cancela den e ultimo dianan aki.
Logicamente acontecimentonan asina no ta algo cu por wordo premira cu un anterioridad amplio, cual ta hasi cu e ta bira un situacion cu tin un grado di urgencia serca Gobierno di Aruba.
Minister Romero tin atencion absoluto pa cu e retonan nobo cu a surgi den aviacion di nos pais y pronto lo bin cu solucionnan factibel pa cu e problematica aki.