Concientisando riba e importancia di conservacion y uzo di nos matanan herbal
Aruba ta conociendo cambionan grandi y positivo pa loke ta nos Sector Primario.
Por aprecia cu awendia hopi mas productor local ta eherciendo e ofishi cu nos grandinan a lanta den dje, esta plantamento den cunucu.
Nos por mira un desaroyo grandi y cu proyectonan moderno den e area di agricultura na Aruba.
Un aspecto importante den plantacion aki na Aruba ta e matanan herbal, cual ta representa un balor agrega enorme na e Sector Primario local.
Si mira bek den historia di Aruba, por realisa cu e presencia di remedinan di tera pa cura diferente malesa tabata esencial, y aki ta unda e matanan herbal ta haya nan prioridad den nos cultura. Y ta pa es motibo cu mester sigui duna empuhe na nos hendenan pa continua cu nos tradicion, p’asina nan keda pas’e pa e siguiente generacionnan.
Como parti di su plan pa conserva, proteha y fortifica e evolucion di Aruba su Sector Primario, Minister Chris Romero a cuminsa ehecuta su plan y vision pa cu Santa Rosa, cual ta encera desaroyo di diferente areanan nobo y educativo, y a cuminsa na e apertura di un Hardin Botanico.
Aruba su prome Hardin Botanico lo fungi como instrumento importante pa nos Sector Primario, pero tambe lo aporta grandemente na nos enseñansa y nos economia.
E prome stap lo ta pa unifica un grupo di experto cu lo tin como tarea principal planificacion y structuracion di e Hardin Botanico, cual lo tin beneficionan den diferente aspecto pa cu nos pais.
Esaki ta un aña cu ta priminti di ta yena cu proyectonan innovativo pa cu e Sector Primario na Aruba.
E proposito principal di Minister Chris Romero ta pa nos pais logra yega na un produccion mas halto di productonan agropecuario local, pero semper di un manera responsabel y na mes momento creando oportunidadnan di estudio y laboral pa e generacionnan futuro.
Minister Romero ta sumamente contento di por mira e interes cu tin den nos comunidad pa loke ta e desaroyo di Aruba su Sector Primario, y su compromiso pa cu Santa Rosa ta absoluto.
Minister ta compromete su mes di hasi tur loke ta den su poder pa por suministra Santa Rosa cu tur lo necesario pa nan duna e atencion y servicio rekeri pa engrandece nos Sector Primario.
E mandatario su mensahe ta hopi cla y concreto: “Mi a tuma e responsabilidad pa ta encarga como Minister pa e Sector Primario di Aruba cu hopi orguyo y interes. Cu esaki mi kier implementa un vision cu lo sirbi como fundeshi pa establece un Sector Primario di calidad y duradero pa nos comunidad”.