Home Politics E beneficionan di un Hardin Botanico ta bay mas leu cu simplemente...

E beneficionan di un Hardin Botanico ta bay mas leu cu simplemente agricultura

SHARE

Den cuadro di apertura di e prome Hardin Botanico di Aruba

Minister di Comunicacion, Transporte y Sector Primario, sr. Chris Romero, a anuncia e apertura oficial di e prome Hardin Botanico pa Aruba.

E Hardin Botanico lo ta situa na Santa Rosa y lo conta cu diferente tipo di matanan herbal cu ta conoci pa nos, cual ta forma parti tambe di e cultura di Aruba.

E meta principal di e Hardin Botanico aki ta aporta conocemento na nos hendenan, pero tambe pa pas’e na nos generacionnan futuro, beneficiando asina no solamente e Sector Primario, pero tambe e sistema educativo y economico di nos pais.

Cu e planificacion y e realisacion di e Hardin Botanico, Ministerio di Sector Primario ta busca pa crea mas interes den nos comunidad pa retoma e practica di plantamento, pero tambe trahamento di remedi di tera, cual ta algo cu ta bayendo perdi pero cu realmente tambe ta parti di nos cultura.

Tambe e lo nifica un oportunidad pa crea un atractivo nobo den nos sector turistico, cual lo ta un atraccion mas pa e turista cu bishita nos isla y lo representa tambe un experiencia educativo pa nan.

Como un centro di estudio, Santa Rosa lo tin e oportunidad tambe pa sigi hasi estudio ariba e conservacion di nos matanan y asina tin un bista mas amplio di cada planta y su uzo. Esaki lo ta beneficioso pa nos comunidad, cu sigur lo bay saca un probecho enorme den e aspecto di salud.

Minister Chris Romero su intencion pa cu e Hardin Botanico ta pa crea un structura cu ta brinda un variedad grandi y extensivo di diferente matanan herbal, unda cu e bishitantenan por aprecia y siña e beneficio di cada un di nan. Lo bay hasi esaki den forma di un tour educativo y interactivo pa asina hasi e bishita di cada persona uno placentero.

Un aspecto sumamente interesante, especialmente pa e hobennan y tambe turistanan, ta un sistema di identificacion digital den cada mata presente na e Hardin Botanico, mediante un app y un systema di bar code. E bishitantenan lo por download e app y na momento cu nan ta pasando serca di e matanan lo por registra tur informacion riba nan smartphone of tablet.

E aspecto innovativo aki lo aporta pa crea mas interes den plantamento y conservacion di nos naturalesa.

E deseo di Minister Romero ta pa nos hobennan por tin e acceso na tur informacion y asina nan tambe por siña y ta consciente di e importancia di nos flora y fauna.

Mester motiva nos hubentud pa den futuro nan tambe por hasi escohencia di estudionan den direccion di agricultura, pa asina e dia di mayan Aruba por conta cu mas experto ariba e terenonan aki.