Den di 8 aña minister president anterior no a reuni cu su departamentonan
Diabierna ultimo Minister President Evelyn Wever-Croes a reuni cu tur e hefenan di departamentonan di su ministerio di asuntonan General. Mester bisa cu tur hefe di departamento tabata presente.
Den e reunion Minister President a duna informacion general di e programa di gobernacion, y mas especificamente e metanan di su ministerio.
Sra. Wever-Croes a comparti cu e hefenan di departamento cu e mes tabata hefe di departamento pa 9 aña na añanan 1994 te cu 2003, y como tal tin hopi comprension pa e retonan y desafionan di hefenan di departamento.
A sigui cu splica con importante integridad ta, y con gabinete Wever-Croes kier yega na integridad y bon gobernacion den henter gobierno. Esaki lo bay paso pa paso, cuminsando cerca e ministernan mes y despues den henter e aparato gubernamental.
Mester remarca cu e hefenan di departamento tur a elogia e iniciativa aki di gobierno, y manera un a exprtesa: integridad tabata practicamente un palabra malo den ultimo 8 añanan.
Tambe Minister President a elabora riba innovacion, y con innovacion por mehora e servicio cu cada departamento ta brinda na publico. Gabinete Wever-Croes lo presenta un plan realistico pa asina digitalisa y automatisa procesonan den aparato gubernamental, pa asina por brinda miho servicio y mes momento por garantisa integridad y bon gobernacion.
Hefenan di departamento bou di Minister President no tabata tin un encuentro asina den ultimo 8 añanan. Minister President lo tene e reunionnan aki riba base periodico cu su hefenan di departamento. Na final di e reunion varios hefe di departamento a elogia e cambio y a gradici e Minister President pa su tempo y pa e atencion na e departamentonan.
