PENSIONADONAN LO SINTI E CAMBIO CU NOS A PRIMINTI
Gobierno lo elimina belasting riba pensioen di biehes
ORANJESTAD– Durante e siman aki, representantenan di pensionadonan di banconan riba peticion via un carta cu nan a manda pa gobierno, a wordo ricibi pa Prome Minister Evelyn Wever-Croes pa delibera y intercambia di opinionnan.
E enfasis di e puntonan di discussion den nan carta tawata riba e tema financiero pa e pensionadonan especialmente dos punto di importancia cuanan ta e peso di belasting pa pensionadonan y e prima di AZV pa pensionadonan.
Prome Minister ta bisa cu esaki tawata un reunion hopi fructifero y constructivo na unda cu e prome mandatario a splica e grupo aki cu pa Gabinete Wever-Croes e pensionadonan tin un prioridad hopi halto den e programa di gobernacion pero como Minister President di nos pais, esaki ta su compromiso pa e puntonan aki di preocupacion di e pensionadonan wordo atendi inmediatamente.
“Mi a informa e grupo aki cu ya mi a cuminsa y ta den deliberacionnan cu departamentonan di Gobierno pa yega na elimina e belasting riba e pensioen di biehes y tambe pa baha e prima di AZV riba e pensionadonan manera cu nos a compromete durante campaña electoral”, Prome Minister a bisa.
Naturalmente e grupo di pensionadonan a haya e noticia aki hopi bon y a keda hopi satisfecho cu tur e informacionnan cu nan a ricibi. Y nan a probecha pa trece mas puntonan dilanti pa gobierno tene cuenta. Nan ta desea di mira nos pensionadonan y nos grandinan haya un rol mas inclusivo den nos comunidad y envolve nan mas den e parti ora di tuma decision. Tambe nan ta desea pa e sistema di mobilidad wordo regla, no solamente den transporte pero tambe pa nan yega mas facil na edificionan, banco of na lugarnan di gobierno. Parkeo tambe ta un probleman pa nan y ta desea cu esaki wordo regla pa nan por yega mas facil na e edificionan aki. Nan a bin cu e idea tambe pa pone loketnan special den banconan of edificionan di gobierno pa asina nan haya trato preferencial.
Prome Minister Evelyn Wever-Croes a keda content y satisfecho cu e reunion cu e grupo di pensionadonan y a gradici nan pa a tuma e iniciativa pa sinta hunto cu Gobierno y trece nan inkietud y ideanan na conocemento di Gobierno.
“Mi ta contento di a reuni cu e grupo di pensionadonan aki y cu nan tambe ta comparti nos vision pa pone e pensionadonan central. Gobierno a priminti di pone e ser humano central, y ta esaki nos ta haciendo tambe y trece e cambio cu Aruba y nos pensionadonan merece.”