Durante Conferencia di Prensa di Gobierno dialuna mainta, Prome Minister sra. Evelyn Wever-Croes a duna un relato amplio di e reunion cu a tuma luga diabierna dia 12 di januari entre e delegacionnan di Venezuela, Aruba, Corsow y representando Reino tabata presente e embahador di Reino. Prome Minister a bisa cu e reunion a dura basta largo teniendo varios tema di interes comun cu a wordo trata.
Un pregunta cu Prome Minister a haya despues cu el a duna su relato tabata si ta berdad Hulanda a tranca e negosacionnan andando. Esaki alabes a bira un rumor den medianan social. Enfaticamente e mandatario a bisa cu no por papia di trancamento di Hulanda y a elabora mas riba con e reunion mes a bay bisando:
“Den e prome mita di e reunion tawata tin deliberacionnan den e sala di reunion. Despues di e deliberacionnan cada delegacion a separa nan mes pa bay contact nan respectivo gobiernonan cu excepcion di Aruba pasobra ami tawata presente y tawata facil pa tur informacion yega na mi. Despues cu e nan a notifica nan gobierno, e delegacionnan a bin bek hunto pa sigui delibera e puntonan cu tawata riba mesa. Manera ta custumber den reunionnan asina, tin hopi discucion y tardansa. E seriedad di e tema a haci cu tur tema wordo trata debidamente. Pero ningun momento por menciona cu e negosacionnan a wordo tranca pero esakinan ta partinan inherente na negosacionnan ora cu no tin tur hende sinta na mesa cu por tuma decision”.