Stichting Musica ta masha satisfecho y agradecido pa e sosten cu Aruba Caiso & Soca Monarch ta ricibi for di publico, aña tras di aña, y ta den pleno preparacion pa un grandioso Aruba Caiso & Soca Monarch 2018.
Carnival Village lo ta yen di ambiente desde e tres anochinan di prefinal riba dialuna 22 di januari te cu diaranson, 24 di januari. Kaarchinan ta obtenibel pa 15 florin pa cada anochi prefinal. Aruba lo conta cu 91 composicion, di cual 72 cancion ta den categoria di Soca y 19 cancion lo ta Caiso. Un total di 78 cantante lo haci nan maximo esfuerzo pa conkista e titulo maximo.
Riba diasabra, 27 di januari e 35 cancionnan cu a logra pasa pa final lo resona pa e publico presente y Aruba lo conoce su Caiso & Soca Monarchs pa Carnaval 64. Tickets pa entrada di e anochi final ta costa 25 florin y ta obtenibel na: Citgo Boulevard, Citgo Palm Beach, Citgo Santa Cruz y Citgo Essoville.
Stichting Musica ta invita un y tur pa yega na Carnival Village y presencia e gran espectaculo annual na unda nos talentonan musical lo sa di sobresali un biaha mas. For di loke por a mira y scucha riba caya durante di e prome paradanan di Carnaval, ya caba por sinti cu e cantantenan y gruponan musical ta prepara pa duna presentacion fuerte riba escenario di Aruba Caiso & Soca Monarch 2018.
Stichting Musica ta gradici tur partners y colaborador cu ta aporta na nos musica y cultura y ta haci e festival posibel, incluyendo SETAR N.V., Tropical Bottling Company, Elite Productions, Aruba Airport Authority, ATCO, Albo Aruba, Ecotech, K&G Boutique, Telearuba y Ministerio di Finansas, Asunto Economico y Cultura.