Desicionnan tuma despues di esaki no ta valido
Prome Minister di nos pais, Sra. Evelyn Wever-Croes a tuma nota di e reaccion di ex Prome Minister Mike Eman cu e intencion pa lanta pueblo contra e Gobierno aki. E mandatario, den conferencia di Prensa di Gobierno, a duna di conoce cu ta importante pa mustra e realidad cu e mesun pruebanan y actonan di Mike Eman.
Prome Minister a presenta cu e pruebanan aki den e prome conferencia di prensa di Gobierno di aña 2018 y mustra esaki na e prensa presente y esakinan ta disponibel tambe pa prensa publica.
1. DECISION DI GABINETE MIKE EMAN DI 13 NOVEMBER 2009:
Un prueba cu Prome Minister a mustra ta e decision di Conseho di Minister di Gabinete Mike Eman cu ta tuma riba 13 di november 2009. E tempo aki AVP a caba di drenta Gobierno. Den e Conseho di Minister aki, e Ministernan di Gabinete Mike Eman dus di AVP, a tuma e decision cu tur e decisionnan cu Gabinete di Nelson Oduber di MEP a tuma den e periodo prome cu eleccion, (“afscheidsbeleid”) y den e periode despues di eleccion, e periodo demisionario, lo wordo “teruggedraaid” dus nan lo wordo declara nulo. Esaki ta un decision cu e gobierno di Mike Eman a tuma.
A base di e decision di 13 di November 2009, e departamentonan di gobierno a traha un maneho cu awo aki a wordo ehecuta. E maneho aki cu ta wordo aproba pa corte cu e tempo ey a duna gobierno rason y tur esnan cu a hiba gobierno corte pa esaki no a haya rason di corte.
2. DECISION DI GABINETE MIKE EMAN DI 29 OCTOBER 2013:
Un otro prueba di decision cu Prome Minister Evelyn Wever-Croes a presenta ta e decision cu Gabinete Mike Eman a tuma dia 29 di october 2013. Den e decision aki Mike Eman cu tabata e minster di Algemene Zaken, a indica cu tur esnan cu tabata aarbeidscontractanten cu ta cay bou di e ministerionan di Gabinete Mike Eman, entrante di 30 di october 2013, e Gabinete Nobo di Mike Eman, lo wordo prolonga “voor de duur van het kabinet van Mike Eman 2”.
Dus esakinan ta dos prueba di decisionnan cu a wordo tuma pa Mike Eman. Un ta pa elimina e decisionnan tuma den e “afscheidsperiode” y e periodo demisionario di Gabinete Nelson Oduber y e otro di 2013 ta pa tuma e mesun hendenan den servicio cu tabata traha cu nan caba pa nan keda “voor de duur van het kabinet van Mike Eman 2”.
Prome Minister Evelyn Wever-Croes a clarifica si acaso tin duda, cu “voor de duur van het kabinet van Mike Eman 2” a vence desde 31 di october 2017. Pa e motibo aki e personanan aki a ricibi e carta corespondente pasobra e decision pa hinca nan den aparato gubernamental a wordo tuma den e period demisionario, dus no ta valido.