Home Politics Prome Minister Evelyn Wever-Croes: Situacionnan dificil den famianan ta haci cu DESAFIO...

Prome Minister Evelyn Wever-Croes: Situacionnan dificil den famianan ta haci cu DESAFIO RIBA TEMANAN SOCIAL TA HOPI GRANDI

SHARE

Vision y meta di Gobierno ta pa trece prosperidad y bienestar den cada hogar

Den prome conferencia di prensa di Gobierno pa aña 2018, Prome Minister Sra Evelyn Wever-Croes elabora riba e desafionan grandi di nos pais y e meta di Gabinete Wever-Croes pa trece prosperidad y bienestar den cada hogar di nos pais poniendo e ser humano central atrobe.

Banda di e desafio grandi di un finansas publico laga atras den un crisis pa e gobierno anterior na unda cu Gobierno di Aruba mester a pidi Hulanda un espacio pa realisa un plan pa asina pronto por ta riba e caminda pa un presupuesto balansa, Aruba tin un siguiente desavio hopi grandi, esta e desavio riba temanan social.

E mandatario ta bisa cu e retonan y problemanan social cu nos tin den nos comunidad ta e resultado di e situacionnan financiero difisil den famianan. Vision y meta di Gobierno aki ta pa tuma e pasonan necesario pa cuminsa alivia e peso cu tin den diferente hogarnan. Lo baha costo di bida. Bin cu control di prijs den tur supermercado. Baha prijs di awa y coriente. Lo percura pa tin mas cuponan di empleo. Esakinan lo ta e prome pasonan pa trece un miho situacion financiero den hogarnan.

Sinembargo, Gobierno di Aruba ta na haltura cu esakinan so no ta suficiente pa resolve e problemanan social di nos pais. Manera ya conoci, aña pasa a cera cu un caso hopi tristo y lamentabel cu e morto di 2 criatura. Y e prome punto riba agenda di Gobierno ta pa atende cu e raport cu a haya for di e instancianan social riba tur loke cu nan tin mester pa realmente contraaresta e problemanan social di Aruba.

Prome Minister a indicia cu ora cu Gobierno a sinta cu e instancianan social pa e prome biaha, e prome pregunata cu a wordo haci na nan ta kico ta e necesidadnan primordial pa nan. Prome Minister a bisa cu e la keda sorprendi cu e instancianan no a bin cu un lista di tur loke nan tabata tin mester pa haci nan trabounan miho, nan no a bisa cuanto computer of cuanto hende nan mester pa wordo inclui den nan personal. Loke nan a pidi ta pa un compromiso di Gobierno.

E instancianan aki den pasado a entrega nan plan y lista sin haya oido di e Gobierno anterior. Y nan a vocifera cu nan ta cansa di entrega lista y plan pasobra esaki nan a bay den lachi y no a haya niun atencion. Y e biaha aki nan kier un compromiso di e Gobierno aki pa tin e siguridad cu Gobierno ta para nan tras pa atende cu e temanan aki y despues lo entrega e lista di necesidad.
Prome Minister a duna di conoce cu di banda di Gobierno di Aruba, dia 5 di december 2017 a entrega e prome compromiso na e instancianan social y di nan banda, Gobierno di Aruba a haya e lista di loke nan tin mester pa brinda un miho servicio riba e tereno social.

Gobierno di Aruba ta den e proceso pa sondea for di unda lo haya e finansas pa cubri e plan aki. Pero e compromiso di Gobierno ta pa di berdad trece alivio den e tension social cu nos tin na Aruba.

Pome Minister Sra. Evelyn Wever-Croes ta expresa su deseo cu e aña aki por ta hopi prospero y cu ta trece bienestar den cada hogar aki na Aruba. Y cu problemanan social por mira un cambio completo. Cu e sosten di cada ciudadano riba nos pais, lo logra esaki. Pasobra ta hunto Aruba ta logra cosnan grandi.