Directie Volksgezondheid (DVG) semper a percura pa educa, informa y concientisa nos pueblo riba salubridad publico. Awor cu dianan di fiesta ta den porta, Director di DVG drs. Jerry Staring ta manda un mensahe pa nos comindad reflexionando riba e aña tras di lomba y ta desea un y tur un pasco y fin di aña yena cu hopi salud, paz, harmonia y alegria.
E director ta mira bek riba un aña 2017 hopi fructifero pa Directie Volksgezondheid, unda cu enberdad a mira hopi cambio pero sin duda cambionan positivo.
Aña 2017 tabata un aña importante pa salubridad publico na unda cu a celebra 100 aña y a percura pa haci esaki hunto cu tur empleado di directie volksgezondheid y pueblo henter. Durante aña DVG a conoce varios cambio, specialmente pa restructura e departamento pa asina por hisa e eficiencia y mustra e capacidad di cada servicio cu DVG ta ofrece na publico. Cambio no tur ora ta facil of ta sosode dibiaha, pero cu perserverancia pa logra un meta na bienestar di nos comunidad semper hunto e ta bira posibel.
Den 2018 DVG ta bay sigui educa y informa nos comunidad riba kiko ta salubridad publico. Kiko esaki ta encera, kiko e tareanan ta pero mas ainda e importancia di esaki.
Esakinan ta algun di e plannan pa e aña venidero pa asina complementa e aña 2017 tras di lomba pa sigui crece como un departamento, optimalisa nos producto y duna servicio di calidad na comunidad di Aruba.
Pa comunidad por pasa dianan di fiesta feliz y saludabel drs. Jerry Staring ta pidi pueblo den nomber di DVG pa tene cuenta cu differente aspecto. Den e ultimo dianan di aña 2017, nos cultura semper ta pa pasa esaki cu famia, come y celebra. Esaki sin duda ta trece alegria, pero semper mester ta haci concientemente. Ora di come, porfabor tene cuenta cu hygiena, laba man bon ora di cushina cuminda, percura pa tur alimento ta bon cushina y prepara. Tambe ta importante pa mantene e alimentonan na un temperatura adecuado y ta bon warda.Banda di esaki sea semper conciente di come y bebe na un manera modera. Si bo tin pensa di consumi alcohol, porfabor tene na cuenta pa no stuur y bebe. Nos comunidad den dianan di fin di aña tambe ta gusta tira klapchi. DVG a percura pa conhuntamente cu Comision di Vuurwerk promove tipsnan pa tira klapchi concientemente. E.o. mester tene cuenta cu si e klapchi ta adecua pa mucha por tira, mayornan semper tira bista riba muchanan, no bay experimenta cu klapchi etc. Tur esakinan ta tipsnan pa asina yuda comunidad bira conciente y evita cualkier situacion indesea.
Finalmente drs. Jerry Staring, Director di Directie Volksgezondheid, kier desea pueblo di Aruba henter un bon pasco y un prospero anja 2018!!!