Home Uncategorized Un aña mas Preservando Pasado pa Futuro! 21 december 2017

Un aña mas Preservando Pasado pa Futuro! 21 december 2017

SHARE

Stichting Monumentenfonds Aruba un biaha mas a duna contenido e aña aki na e meta di preserva pasado pa futuro den diferente areanan tanto mantencion, conscientisacion y educacion a logra un aña exitoso.
Mantencion y Proyectonan

Henter aña nos ta enfoca riba trabounan di mantencion cual ta necesario pa por garantisa cu e monumentonan cu ta pertence na nos fundacion ta keda den bon estado. E aña aki e edificio di Casita Geel na Weststraat a haya un mantencion grandi cu a inclui drechamento di e dak, scheurnan den muraya y a verf e edificio y cura completo. Cu cooperacion di Cuerpo di Bombero Aruba a laba e California Lighthouse completamente. Mientras tanto tambe ta preparando pa trabounan di mantencion na Watertoren Oranjestad y otro reparacionan na entre otro edificio di School 1888 y edificio di Censo. Pa locual ta trata e edificio di Stadhuis y Censo tambe a haci un cambio grandi di e unidadnan di e sistema di aircondition durante e luna di december.

Den un esfuerzo pa mantene e area rondo di nos obhetonan monumental limpi, ya pa tres aña SMFA tin un acuerdo cu Stichting Trabou tin pa mantene e grafnan di commandeur, forno di kalki y tanki di awa den Rancho limpi periodicamente.

A sinta na mesa cu diferente doñonan di edificionan monumental pa locual pa duna informacion y tambe conseho pa potencial proyectonan. Na luna di juni tambe durante e celebracion di e bintiun aniversario di e fundacion a hasi inauguracion di e panelnan solar na oficina di SMFA y un punto di recarga pa vehiculonan electrico.

Conscientisacion

Pa locual ta trata proyectonan di conscientisacion , SMFA a ricibi e aña aki na luna di januari e exposicion di ‘Cas di Madu’ cu fotografianan di casnan di cunucu di Sr. Claudius Daly. SMFA ya e ultimo añanan ta ofrece e espacio den su sala di reunion na artistanan cu kier expone nan obranan cu e temanan di monumentonan di Aruba.
Durante e aña aki tambe a duna rondleiding na diferente bishitantenan cu e meta pa duna informacion tocante Aruba su Monumentonan algun ehempel ta Raymond Rutting y Marco Borsato cu den cuadro di nan proyecto ‘Gezichten van Aruba’ a fotografía monumentonan den Oranjestad. Esaki a resulta den un exposicion na Amsterdam y un bunita buki. Tambe a duna un recorido y informacion den area di San Nicolaas na e hefe di redaccion di e revista Herenhuis, y na e autornan di e travel guide ‘Caribisch Nederland’ di ANWB.

Tambe e directora di Monumentenfonds a duna un presentacion na Bestuurskantoor den cuadro di ‘Coffee bites’ caminda a pone enfasis na e rol di monumentonan den nos comunidad.

Na luna di juni e team di SMFA a bishita e actividad di Monumento Habri na Curaçao y na november tambe a forma parti di e Curaçao Heritage conference cu e aña aki tabata tin e tema di Heritage Matters. E directora a duna un presentacion tocante financiamento di restauracion.
Hunto cu diferente partnersnan cultural SMFA a organisa actividadnan pa publico. Na april a celebra e International Day for Monuments and Sites y na november a organisa e di cuater edicion di e tan gusta Fiesta di Cunucu.

Educacion

Na maart SMFA a reparti mas cu nuebe mil buki tocante monumentonan di Aruba pa tur alumnonan di scolanan basico. Esaki tabata un proyecto di dos studiante di IPA cu a crea e buki aki pa na un manera dibertido siña e alumnonan tocante monumentonan di Aruba. Danki na e cooperacion di VNO y ATA a logra haci e proyecto aki realidad.

Tambe a duna diferente presentacion na kleuter y scol basico y a duna caminatanan cu guia na entre otro alumnonan di EPI y EPB. Y tambe e aña aki a ricibi studiante di Hulanda pa haci nan pasantia na Aruba. Durante bishita na Hulanda tambe a reuni cu studiantenan di Hogeschool Rotterdam y TU Delft tocante di posibilidadnan pa pasantia y trabou na Aruba den e area di herencia cultural.

Pa locual ta trata contactonan internacional e directora y lider di proyecto di SMFA a haci un bishita di trabou na Hulanda na luna di april caminda a bishita e Erfgoed Event y a reuni cu directornan di diferente organisacionnan pa intercambia informacion y tambe a sinta cu Nationaal Restauratie Fonds Aruba cual ta e financiado di proyectonan manera e Lighthouse y Nicolaas Store.

2018

Pa locual ta trata e aña cu ta drentando SMFA ta planea pa sigui cu trabounan di mantencion di e monumentonan cu ta pertenece na SMFA y tambe ta preparando pa un proyecto nobo di restauracion cual lo keda anuncia den e proximo simannan. Tambe lo sigui enfoca den locual ta conscientisacion y educacion tocante e importancia di nos monumentonan y ta planeando pa celebra e luna di monumento un biaha mas na september cu diferente actividadnan pa publico.

Di parti di e team di monumentenfonds nos kier desea henter e pueblo di Aruba feliz Dianan di Fiesta y tambe gradici na tur e organisacionnan, sponsorsnan y partnersnan cultural cu a traha hunto cu nos pa sigui preserva pasado pa futuro!