ORANJESTAD – E total di turismo ‘stay-over’ pa nos isla a aumenta cu 9.5% si compara esaki cu november 2016. Si exclui e bishitantenan di Venezuela, por mira un aumento di 12.5% cual ta igual na un total di 79.357 bishitante pa nos isla. E cifranan ta indica crecemento den mercadonan clave pa Aruba, manera Merca, Canada, Brazil y Argentina.
Pa e asina yama year-to-date 2017, 965.004 turista a bishita nos isla, cual ta 4% menos cu e mesun temporada aña pasa. Si nos exclui e bishitantenan Venezolano, por mira un aumento di 8.5%, ekivalente na 880.151 bishitante.
Turismo ‘stay-over’
Aruba ta wordo representa den tres diferente continente. Compara cu november aña pasa, pa 2017 e turismo procedente for di e continente Norte Americano a aumenta cu 15% y ta trece 70.7% di total di turismo pa nos destinacion. Na november, Merca a aumenta cu 15.3% y Canada cu 10.2%. Di januari te cu november 2017, e continente aki a subi cu 10.2% pa turismo pa Aruba.
Continente Latino Americano a baha cu 5.7% di cual Venezuela a baha cu 17% compara cu november aña pasa. Brazil a subi cu 43.3% y Argentina a subi cu 19.2%. E continente di Latino America ta trece 16.9% di e total di turismo pa luna di november na nos isla. Di januari te cu november 2017, turismo procedente di Latino America a baha cu 35.1% primordialmente mara na caida for di Venezuela.
Pa loke ta Europa por nota cu turismo a aumenta cu 3.4% compara cu e mesun luna aña pasa. Hulanda a baha cu 0.3%, y Reinonan Uni a baha cu 23.9%. E continente Europeo ta representa 8.7% di turismo pa Aruba pa luna di november.
Di januari te cu november 2017, Europa a trece 4.6% turista mas pa Aruba compara cu e mesun temporada na 2016.
Turismo crucero
Durante november 2017, 104.242 pasaheronan crucero a bishita nos destinacion riba un total di 51 diferente barconan crucero. Compara cu luna di november aña pasa, turismo crucero a crece cu 33.9% (november 2016 Aruba a haya 77.826 bishitante for di 38 crucero). Di januari te cu november 2017, Aruba a ricibi 693.609 pasahero crucero for 301 diferente barco. Esaki ta ekivalente na un aumento di 24.9% pasahero adicional pa nos isla (41 barco crucero mas) compara cu e mesun temporada aña pasa.
Ademas di e cifranan aki, ta bon pa menciona cu na november e temporada ‘high-season’ a inicia cual lo sigui te na april 2018.
Tourism Receipts / Central Bank of Aruba
Di acuerdo cu Banco Central e asina yama ‘Tourism Receipts’, di april te cu juni 2017 (Q2), a contribui cu AWG 712.9 miyon den nos economia, cual ta un aumento di 6.3% compara cu e mesun temporada na 2016.
Hotelnan / AHATA
Segun Aruba Hotel and Tourism Association pa e luna di november, e ‘Average Daily Rate’ (ADR) a aumenta cu 8.6% compara cu 2016. Esaki den cifra ta US$ 190.40 na 2016 compara cu US$ 206.76 pa 2017. Pa e ‘Year-to-Date’ esaki a resulta den un aumento di 4.3% di US$ 220.69 na 2016 pa US$ 230.20 den 2017. E entrada pa camber disponibel, e asina yama RevPAR a aumenta cu 16.2% di US$ 151.90 na november 2016 pa US$ 176.46 na november 2017. Di januari te cu november 2017, esaki a aumenta cu 10.3%, na 2016 e tawata US$ 176.62 y pa e mesun temporada den 2017 el a subi pa US$ 194.79 E anochinan ocupa (ORN) pa camber a aumenta cu 8.2% pa november 2017 y pa e ‘Year-to-Date’ 2017 el a aumenta pa 6.9%. Gran parti di e aumento aki ta debi cu Tropicana Resort a habri cu 53 camber adicional fin di december 2016.
E cifranan di AHATA ta basa riba 14 propiedadnan incluyendo mayoria di tur e hotelnan cu excepcion di Hilton Aruba.