Departamento di Asunto Social

ORANJESTAD – Diadomingo 3 di december ta Dia Internacional di Persona cu Limitacion. Departamento di Asunto Social ta reflexiona specialmente riba ciudadanonan cu ta biba cu un limitacion. Esakinan ta personanan cu tin un limitacion fisico, mental o sensorial (p.e. di bista of oido) y tambe e famianan y otro personanan significante den nan bida cu ta yuda cu nan cuido y ta duna sosten. Un palabra di aprecio y apoyo ta bay p’e famianan kendenan ta indispensabel pa e proteccion y aporte den bida di nan mayor, ruman of yiu ken a nace cu un limitacion of cu a adkeri un limitacion den nan funcion durante e transcurso di nan bida.
Segun e ultimo censo na aña 2010, Aruba ta conta un populacion di circa 7000 persona cu limitacion. Esaki ta un den cada 15 persona, o sea 6.9% di e populacion cu tin un of mas limitacion. E limitacionnan ta varia. E tipo mas presente na Aruba ta e limitacion di bista. Sigui pa limitacion fisico (canamento), memoria, oido, habilidad pa comunica y habilidad pa bisti.
E causanan principal pa e limitacionnan na Aruba ta accident den 29.8% di e casonan, sigui pa herencia genetico den 29.4% di e casonan. Biehes ta causa 17.6% di e casonan y malesa (cronico) ta causa 11.6% di e casonan.
E poblacion di personanan cu limitacion rond mundo generalmente ta biba bou di condicionnan menos faborabel y pa e motibo di nan limitacion ta consideranan como un grupo vulnerabel. Hopi biaha nan situacion di salud ta relativamente menos bon. E nivel di educacion ta mas abou, e participacion den mercado laboral ta menos y pa e motibo aki nan capacidad economico tambe ta relativamente poco. Depende e tipo di limitacion y severidad di e limitacion hopi persona ta biba mayor parti di, si no henter nan bida dependiente riba otro hende.
Basa riba investigacion haci bou di clientenan cu limitacion y nan cuidadonan, Departamento di Asunto Social ta pone atencion riba ocho area cu mas tanto ta influencia e calidad di bida di personanan cu limitacion.
Pa mehora e calidad di bida ta importante pa percura cu tin servicionan cu ta ahusta na e necesidad di e persona cu limitacion. Mester crea e posibilidad pa e persona cu limitacion por integra den mercado laboral y haya empleo paga o boluntario cu e por haci. Mehoracion di e aceptacion y socialisacion di e persona cu limitacion den comunidad pa e por sinti cu e ta parti di dje. Mester crea e posibilidad y infrastructura pa e persona por mobilisa mas pa e.o. educacion pa su desaroyo personal bira mas accesibel pe. Crea un miho sistema di revalidacion pa e por yega y mantene e maximo potencial di su funcion. No por falta e sosten pa e famia y personanan significante cu ta encarga cu e cuido y sosten di e persona cu limitacion.
Un palabra di apoyo y felicitacion tambe ta bay pa tur grupo di interes, formal y informal, y pa e Plataforma di organisacionnan cu tin e porvenir y bienestar di Personanan cu Limitacion na pecho. E trabou cu boso ta haci y amor cu ta duna na e grupo special aki ta indispensabel y impagabel.
‘Union ta haci Forsa’, y cu e pensamento aki Departamento di Asunto Social kier gradici Plataforma pa Persona cu Limitacion (PPL) pa e tremendo trabou cu nan ta haci y felicitanan cu nan 10 aña di existencia colaborando pa sali na vanguardia pa miho condicionnan di biba pa e grupo specifico aki. Pabien!