Santa Cruz: Diadomingo 26 di november 2017 a recorda e di 31 aña di fayecimento di e estadista y Libertador Betico Croes. Na e ocasion aki tabata tin un ceremonia di ofrenda floral dilanti su kelder den santana di Santa Cruz, caminda familiarnan, ministro y parlamentarionan, miembronan di conseho di partido y militancia di MEP, miembronan di Fundacion Betico Croes a bin hunto pa duna honor y respet na e gran Arubiano aki.
Di parti di Fundacion Betico Croes, sr. Maikito Croes y sra. Gloria Croes a pone flor na tumba di Betico Croes. Pa MEP esaki tabata na encargo di dr. Gerrit Croes y minister Glenbert Croes. A sigui cu discursonan di Maikito Croes, Gerrit Croes y Glenbert Croes, caminda nan tur a duna reflexion riba e bida, lucha y sacrificio di Betico y specialmente e union den pueblo cu semper el a propaga. Despues tur esnan presente a acudi pa e Santo Sacrificio di Misa dedica na nos Libertador Betico Croes.
Tanto na e ceremonia den Santana como den misa, un gran cantidad di persona tabata presente y a mustra nan gratitud y aprecio pa tur loke cu Betico a significa pa e pais aki.